Այսօր հրապարակված «Լրագրողներ առանց սահմանների» միջազգային կազմակերպության տարեկան զեկույցը, ըստ որի, 2010 թվականի համեմատ Հայաստանը զգալի թռիչք է արձանագրել` 101-րդ տեղից հասնելով 77-րդ տեղ, «Հրապարակ» օրաթերթի խմբագիր Արմինե Օհանյանին տարակուսանքի տեղիք է տալիս: Այս մասին նա ասաց «Առաջին լրատվական»-ի հետ զրույցում:
Օհանյանի խոսքով, հայաստանյան մամուլի առաջընթացի մասին հայտարարությունից ընդամենը մի քանի տող հետո նկարագրվում է այն իրավիճակը, որում հայտնվել են հայկական լրատվամիջոցները: «Զեկույցում, օրինակ, խոսվում է դատական գործընթացների մասին: Ես ենթադրում եմ, որ առաջընթացի մասին եզրակացության գալու համար հիմք է հանդիսացել այն, որ Հայաստանում մամուլի նկատմամբ բռնությունների դեպքերը նվազել են: Բայց այս ճանապարհն ավելի նենգ ու վտանգավոր է, և աշխատանքն էլ այս դեպքում բարդացել է, քան թե այն ժամանակ, երբ թշնամիդ ֆիզիկական ուժի է դիմում»,- նկատեց թերթի խմբագիրը:
Արմինե Օհանյանի կարծիքով, զեկույցի՝ հայաստանյան մամուլի առաջընթացին վերաբերող մասը մի փոքր չափազանցված է: «Հակառակը, երբ հետ ես նայում, տեսնում ես, որ 2011 թվականին հաստատ ավելի հեշտ չէր աշխատել, քան ասենք՝ 2010-ին կամ 2001-ին: Այնպես որ, զեկույցում տեղ գտած, առաջընթացի մասին ձևակերպումն ինձ համար մի քիչ անհասկանալի է»,- ասաց նա:
Նշենք, որ ըստ «Լրագրողներ առանց սահմանների» միջազգային կազմակերպության` 2010թ. համեմատ Հայաստանը զգալի թռիչք է արձանագրել` 101-րդ տեղից հասնելով 77-րդ տեղ: Մամուլի ազատությանը վերաբերող զեկույցը, այդուհանդերձ, արձանագրում է նաև հետևյալը. «Հայաստանի դիրքերի 24 հորիզոնականով բարելավումը թվում է, թե նշանակալի առաջընթաց է, սակայն Հայաստանը փաստացի վերադարձել է այնտեղ, որտեղ գտնվում էր 2008թ. վիճելի ընտրություններից առաջ: ԶԼՄ-ները շարունակում են մնալ դատական հետապնդումների ճնշման տակ, օրենքով պահանջվող փոխհատուցման չափերը մտահոգիչ են»: Ըստ «Լրագրողներ առանց սահմանների» կազմակերպության` հայկական ԶԼՄ-ներում վիճակը կայունացել է 2008-ից հետո, սակայն դատական գործերն ու հետապնդումները շարունակում են միջամտության էական գործոն հանդիսանալ անկախ լրատվամիջոցների դեպքում:
