Նուբիա դել Կարմեն Պրեսան, որը վստահեցնում էր, որ 2010 թվականի սեպտեմբերին Maserati մեքենայով իրեն է հարվածել Լինդսի Լոհանը, դատի է տվել վերջինիս: Այս մասին հայտնում է Associated Press գործակալությունը:
Հայցում նշվում է, որ Պրեսան լուրջ վնասվածքներ է ստացել, տառապանք ու ցավ է կրել: Նա փոխհատուցում է պահանջում իր բուժման ծախսերը փակելու և աշխատավարձի համար, քանի որ այդ ընթացքում աշխատանքի չի ներկայացել:
Լոհանի պաշտոնական ներկայացուցիչը հայտարարել է, որ ո՛չ ինքը, ո՛չ էլ փաստաբանները դատարան ներկայանալու ծանուցում չեն ստացել և պատրաստ չեն միջադեպը մեկնաբանել:
Նշենք, որ Լոհանը 2007 թվականին պայմանական ազատազրկման էր ենթարկվել ոչ սթափ վիճակում մեքենա վարելու համար, այնուհետև ժամկետը եկարացրել էին ևս մեկ տարով: 2010 թվականի մայիսին Լոս Անջելեսի դատարանը պարտավորեցրեց դերասանուհուն պարբերաբար հանձնել ալկոհոլի և թմրանյութերի անալիզ և կրել հատուկ «հակաալկոհոլային» թևնոց:
2011 թվականին վզնոցի գողության համար դերասանուհին դատապարտվել է պայմանական ազատազրկման, որի շրջանակում նա պարտավորել է իրականացնել հանրային աշխատանքներ:
