Հունվարի 25-ին տեղի է ունեցել Հայաստանի ԱԳ նախարար Էդվարդ Նալբանդյանի աշխատանքային այցելությունը Լատվիա:
ՀՀ ԱԳՆ մամլո գրասենյակից «Առաջին լրատվական»-ին տեղեկացնում են, Ռիգայում նախարար Նալբանդյանին ընդունել է Լատվիայի Հանրապետության նախագահ Անդրիս Բեզինշը:
Ա. Բեզինշը նշեց, որ Լատվիան շահագրգռված է բարեկամական Հայաստանի հետ հարաբերությունների առավել խորացման և ամրապնդման մեջ, և իր երկիրը պատրաստ է լրացուցիչ ջանքեր գործադրել այդ ուղղությամբ:
Հանդիպմանը անդրադարձ է կատարվել բարձրաստիճան այցերի շարունակականության ապահովմանը, տարբեր բնագավառներում երկկողմ համագործակցության խթանման նպատակով ձեռնարկվելիք քայլերին և տարածաշրջանային խնդիրներին:
Հայաստանի արտգործնախարարը Լատվիայի նախագահին է ներկայացրել արցախյան հիմնախնդրի հանգուցալուծման բանակցային գործընթացը, Հայաստանի մոտեցումները տարածաշրջանային խնդիրների լուծման վերաբերյալ:
Զրուցակիցները քննարկել են Հայաստան-ԵՄ հարաբերությունները, այդ ձևաչափում Հայաստան-Լատվիա համագործակցությունը:
Է. Նալբանդյանի հաջորդ հանդիպումն իր լատվիացի գործընկեր Էդգարս Ռինկևիչսի հետ էր:
Զրույցի ընթացքում նախարարներ Նալբանդյանն ու Ռինկևիչսը քննարկել են պետությունների ղեկավարների միջև ձեռք բերված պայմանավորվածությունների կատարման ընթացքը, գոհունակությամբ նշել, որ Հայաստանի և Լատվիայի միջև հարաբերությունները վերջին շրջանում դինամիկ զարգանում են. անցած տարիների ընթացքում տեղի են ունեցել երկու երկրների նախագահների, ինչպես նաև արտաքին գործերի նախարարների փոխադարձ այցելություններ, մի շարք հանդիպումներ միջազգային համաժողովների շրջանակներում:
Նախարարների բնորոշմամբ դա ի ցույց է դնում երկկողմ հարաբերությունների առավել ամրապնդման փոխադարձ շահագրգռվածությունը:
Նախարարներն ընդգծել են, որ իրենց ղեկավարած գերատեսչությունների միջև պարբերական խորհրդատվությունները լավ հիմք են ստեղծում համագործակցության առավել զարգացման համար:
Բանակցությունների օրակարգում էին միջազգային կազմակերպությունների շրջանակներում համագործակցության և միմյանց թեկնածությունների աջակցության հարցերը: Այս ենթատեքստում Լատվիայի ԱԳ նախարարը շնորհակալություն է հայտնել Եվրախորհրդի մարդու իրավունքների հանձնակատարի պաշտոնում Լատվիայի ներկայացուցիչ Նիլս Մույժնիեկսի թեկնածությանը սատարելու համար:
Երկուստեք նշվել է, որ վերջին շրջանում առավել ընդլայնվել է Հայաստանի և Լատվիայի միջև իրավապայմանագրային դաշտը, ինչը լավ նախադրյալներ է ստեղծում երկու երկրների միջև տարբեր բնագավառներում առավել ակտիվ համագործակցություն ծավալման համար:
Հայաստան – Եվրամիություն հարաբերությունների ենթատեքստում նախարարներ Նալբանդյանն ու Ռինկևիչսը մտքեր են փոխանակել Եվրոպական հարևանության քաղաքականության գործողությունների ծրագրի իրականացման ընթացքի և Արևելյան գործընկերության շրջանակներում համագործակցության վերաբերյալ:
Նախարարների միջև քննարկված հարցերի կարևոր կետերից էր տնտեսական համագործակցության առավել ամրապնդումն ու ընդլայնումը:
Նալբանդյանն ու Ռինկևիչսը խոսել են նաև մշակութային փոխանակումների ակտիվացման շուրջ:
Է. Ռինկևիչսի խնդրանքով Է. Նալբանդյանը ներկայացրել է արցախյան հիմնախնդրի կարգավորման բանակցային գործընթացի վերջին զարգացումները: Այս ենթատեքստում երկուստեք շեշտվել է, որ հիմնախնդրի խաղաղ կարգավորումն այլընտրանք չունի:
Զրուցակիցները մտքեր են փոխանակել նաև տարածաշրջանային խնդիրների, այդ թվում՝ Իրանի միջուկային ծրագրի վերաբերյալ: Այդ առումով Նալբանդյանը վերահաստատել է Հայաստանի դիրքորոշումը, որ խնդրի լուծումը պետք է գտնել երկխոսության, բանակցությունների և փոխհամաձայնության միջոցով:
Է. Նալբանդյանն իր լատվիացի գործընկերոջը հրավիրեց այցելել Հայաստան: Ընդունելով հրավերը՝ Է. Ռինկևիչսը առաջարկեց այցելությունն իրականացնել ընթացիկ տարվա երկրորդ կեսին:
Նախարարների հանդիպումից հետո նրանք հանդես են եկել համատեղ մամուլի ասուլիսով:
Ռիգայում Էդվարդ Նալբանդյանը հյուրընկալվել է նաև Լատվիայի Սեյմում, ուր հանդիպում է ունեցել Սեյմի նախագահ Սոլվիտա Աբոլտինայի հետ: Հանդիպմանը ներկա են եղել նաև Լատվիայի խորհրդարանի արտաքին հարաբերությունների հանձնաժողովի նախագահ Էրիկս Կալնինշը, հայ-լատվիական միջխորհրդարանական համագործակցության խմբի նախագահ Իվանս Կլեմենտյևսը, խորհրդարանական խմբակցությունների ներկայացուցիչներ:
Լատվիացի խորհրդարանականների հետ հանդիպմանը Է. Նալբանդյանը քննարկել է երկու երկրների հարաբերություններում խորհրդարանների դերակատարությունը՝ նշելով, որ Հայաստանը կարեւորում է խորհրդարանական դիվանագիտությունը` որպես երկրների և ժողովուրդների միջև համագործակցության կարևոր ձևաչափ: Հանդիպմանը քննարկվել են երկկողմ, տարածաշրջանային և միջազգային հարցեր:
Լատվիայի Սեյմի նախագահը կարևորել է երկրի զարգացման գործում լատվիահայ համայնքի դրական ներգրավվածությունը և դերակատարումը:
Խորհրդարանում Էդվարդ Նալբանդյանը ծավալուն հարցազրույց է տվել լատվիական առաջատար «Լատվիաս Ավիզե» թերթին:
Նախարար Նալբանդյանի օրակարգում է եղել նաև հանդիպումը Սեյմի՝ Լատվիա-Հայաստան միջխորհրդարանական բարեկամության խմբի հետ, որը Սեյմի ամենաբազմանդամ խումբն է և ներառում է շուրջ 30 պատգամավոր: Պատգամավորների հետ հանդիպմանը Հայաստանի ԱԳ նախարարը ներկայացրել է ՀՀ արտաքին քաղաքականության հիմնական ուղղությունները, քննարկվել են հայ-լատվիական հարաբերությունների, տարբեր ոլորտներում երկկողմ համագործակցության առավել ընդլայնմանն առնչվող հարցեր, պատասխանել է պատգամավորներին հետաքրքրող բազմաթիվ հարցերին:
Ավարտելով այցելությունը՝ Էդվարդ Նալբանդյանը Ռիգայից ուղևորվել է Վիլնյուս:
