Ֆրանսիայի Սենատի կողմից Հայոց ցեղասպանության ժխտումը քրեականացնող օրինագծի ընդունումը շատ կարևոր է ոչ միայն հայ-ֆրանսիական հարաբերությունների, այլև Ցեղասպանության միջազգայնացման տեսանկյունից: Այսօր կայացած մամուլի ասուլիսի ժամանակ այս մասին ասաց ԱԺ փոխխոսնակ Էդուարդ Շարմազանովը:
«Ֆրանսիան ցույց տվեց, որ հավատարիմ է համամարդկային արժեքներին, մարդու իրավունքների պաշտպանությանը և օրինակ կծառայի առաջադեմ մյուս երկրների համար: Բոլորը պետք է գիտակցեն, որ հանցագործության ժխտողականությունը մեծ հանցագործություն է և պատժելի արարք»,- նկատեց նա:
Ըստ Շարմազանովի, նման օրինագծի ընդունումը պայմանավորված է նրանով, հայաստանյան իշխանությունները այս տարիներին ճկուն և հայամետ քաղաքականություն են վարել:
«Ցեղասպանության ճանաչման մասին այս վերջին շրջանում շատ ավելի խոսվեց, քան նախկինում: Այս օրինագծի ընդունոմը պատահականություն չէր: Ցեղասպանության ճանաչմանն ուղղված մեր պայքարը
պետք է շարունակվի այնքան ժամանակ, քանի դեռ Թուրքիան այն չի ճանաչել»,- ամփոփեց ԱԺ փոխխոսնակը:
Նշենք, որ երեկ` հունվարի 23-ին, Ֆրանսիայի Սենատում Հայոց ցեղասպանության ժխտման համար քրեական պատասխանատվության ենթարկելու մասին օրինագիծն ընդունվել էր ձայների բացարձակ մեծամասնությամբ: