Բրիտանական Mullock’s աճուրդի տունը աճուրդի է հանելու լոտ, որը մեծ իրարանցում է առաջացնելու ոչ միայն արվեստի, այլ նաև պատմության սիրահարների շրջանում: Բոլոր ցանկացողներին եզակի հնարավորություն է ընձեռված ձեռք բերել ԽՍՀՄ առաջնորդ Իոսիֆ Ստալինի բրոնզե հետմահու դիմակը: Այս մասին հաղորդվում է աճուրդի տան կայքում տեղադրված հայտարարության մեջ:
Դիմակի հետ միասին աճուրդի են հանվելու նաև Ստալինի բրոնզե ձեռքերը: Դրանք դիմակի ինը բրոնզե օրինակների հետ (որոշ տվյալներով 12) պատրաստվել են օրիգինալ գիպսե դիմակից, որը անմիջապես արվել է առաջնորդի մահվանից հետո: Դրանք բոլորը գտնվում են նախկին ԽՍՀՄ տարածքում` տարբեր մասնավոր հավաքածուներում: Եվ միայն երկու հավաքածու է դուրս բերվել ԽՍՀՄ սահմաններից դուրս:
1990-ական թվականներին արվեստաբան Ջեյմս Բիրչը, որը Մոսկվայում կազմակերպել էր բրիտանացի նկարիչ-ավանգարդիստներ Գիլբերտի և Ջորջի ցուցադրությունը, ձեռք է բերել Ստալինի հետմահու դիմակի երկու օրինակ: Դրանցից մեկը վաճառվել է Sotheby’s աճուրդում:
«Սա միակ շանսն է երկար տարիների համար նմանատիպ իր ձեռքբերելու համար»,- հայտարարել է The Daily Mail-ին Mullock’s-ի աշխատակից Ռիչարդ Վեստվուդ Բրուքսը: «Այլևս հնարավորութուն չի լինի սեփական հյուրասենյակի համար ձեռք բերել իսկական Ստալին»,- հավելել է նա:
Փորձագետն ավելացրել է, որ հետմահու դիմակներ պատրաստելու սովորույթի արմատները ձգվում են հեռավոր անցյալ` Հին Հունաստանի և Հին Եգիպտոսի ժամանակներ. այն կառավարիչների արտոնությունն էր:
Mullock’s-ի փորձագետները լոտը նախապես գնահատել են 3-5 հազար ֆունտ սթեռլինգ: Աճուրդը տեղի է ունենալու հունվարի 24-ին: