2008-ի մարտի 1-2-ի դեպքերի առնչությամբ հարուցված քրեական գործի նախաքննության վերաբերյալ ՀՀ հատուկ քննչական ծառայության կողմից անցած տարվա դեկտեմբերի վերջին տարածած տեղեկանքը ոչ միայն չի փարատել ՀԱԿ-ի ունեցած կասկածները`գործի քննության օբյեկտիվության, բազմակողմնաիության ու լրիվության ապահովման առումով, այլև հարուցել է նորերը: Այսօր կայացած մամուլի ասուլիսի ժամանակ նման տեսակետ հայտնեց Հայ ազգային կոնգրեսի պետաիրավական հանձնախմբի համակարգող Գագիկ Ջհանգիրյանը:
«Փաստաթղթի հիմնական նպատակը մարտյան դեպքերին, իրավապահ և ուժային մարմինների գործողություններին նախկինում տրված իրավաբանական անգրագետ ու սխալ քրեաիրավական գնահատականներն ամեն գնով հաստատելն ու հիմնավորելն է: Սպանություններից մի քանիսի բացահայտման աջակցելուն միտված Փաստահավաք խմբի երեք զեկույցներում վկայակոչված փաստերի ու եզրակացությունների անթաքույց առարկումն ու հերքումը»,- նկատեց նա:
Ջհանգիրյանի խոսքով՝ տեղեկատվական հաղորդման բաժիններին ծանոթանալիս կարծիք է ձևավորվում, որ Փաստահավաք խմբի զեկույցներում ամեն ինչ միտումնավոր խեղաթյուրված ու կեղծված է: «Իսկ մեր եզրակացությունը մեկն է` մարտի 1-ի առավոտյան Ազատության հրապարակում ոստիկանության գործողությունները կրել են բացահայտ ապօրինի, հանցավոր, իսկ ինքնապաշտպանության դիմած ՀՀ քաղաքացիներին գործողությունները եղել են օրինական ու իրավաչափ: Հանցավոր, հանրորեն վտանգավոր ոտնձգություններից պաշտպանվելն, ըստ օրենքի, ՀՀ յուրաքանչյուր քաղաքացու իրավունքն է: Ուստի, կարող ենք եզրակացնել, որ ՀՔԾ-ն ու ՀՀ գլխավոր դատախազությունը մարտյան դեպքերից չորս տարի անց էլ շարունակում են մարտի 1-ի իրադարձությունները ներկայացնել գլխիվայր, շուռ տված և ընդհակառակաը: Իրավապահ և ուժային մարմինների բացահայտ ապօրինի գործողություններին տալիս են կամայական գնահատականներ, փորձում դրանք ներկայացնել որպես վերջիններիս օրինական լիազորությունների իրականացում»,- ասաց Գագիկ Ջհանգիրյանը:
ՀԱԿ ներկայացուցիչը նաև նշեց, որ հատուկ աչք է ծակում այն հանգամանքը, թե նախաքննական մարմինը ինչպես է փորձում սևացնել ու վարկաբեկել բոլոր սպանվածներին` բացի ներքին զորքերի սպայից ու շարքայինից: «Նպատակը, մեր կարծիքով, մեկն է`հասարակության, միջազգային կառույցների, դեպքերի իրական բնույթին անտեղյակ մարդկանց մոտ տպավորություն ստեղծել, թե սպանվածները քրեական բացասական բնութագիր ունեցող անձիք են, հանցագործներ: Բացի այդ, ՀՔԾ հաղորդագրությունում լռության է մատնված Ռոբերտ Քոչարյանի` մարտի 1-ի «Արտակարգ դրություն հայտարարելու մասին» հրամանագրի սահմանադրականության հարցը և արտակարգ դրության ռեժիմի ապահովմանը ՊՆ ներգրավման օրինականությունը: Արդյոք նման հրամանագիր ընդունելով` Ռոբերտ Քոչարյանն ակնհայտորեն դուրս չի՞ եկել Սահմանադրությամբ ՀՀ նախագահին վերապահված լիազորությունների շրջանակից և պատասխանատվություն չի՞ կրում հետագա բոլոր հանցագործությունների համար»,- ասաց Գագիկ Ջհանգիրյանը:
Նա նաև ընդգծեց, որ անհասկանալի է մարտի 1-ի իրադարձություններին ապօրինի, զինված խմբերի մասնակցության խնդրի ամբողջական անտեսումը:
«Ոստիկանության աշխատակիցներն ու ներքին զորքերի զինծառայողները իրենց մոտ ունեցել են և գործադրել չհաշվառված ապօրինի հրազեն, երկրորդ՝ որ իրադարձություններին իրոք մասնակցել են բանակի, ԼՂՀ ոստիկանության զինված ստորաբաժանումներ և ապօրինի զինված ուժեր»,- նկատեց նա:
ՀԱԿ ներկայացուցիչը նկատեց, որ իշխանություններն անում են ամեն հնարավոր բան`փակելու համար մարտի 1-ի էջը: «Ծախսած միջոցների չնչին մասը գործադրեիք մարտյան իրադարձությունների բացահայտման համար: Այս հաղորդագրությունը խայտառակություն է, այստեղ հակասությունները բազմաթիվ են»,- նշեց Ջհանգիրյանը:
Պատասխանելով լրագրողներից մեկի այն հարցին` կա՞ անհրաժեշտություն` հարցաքննելու ՀՀ առաջին նախագահ Լևոն Տեր-Պետրոսյանին, ՀԱԿ ներկայցուցիչը նշեց. «ՀՔԾ-ն ՀՀ առաջին նախագահին հարցաքննելուց առաջ լավ կանի հարցաքննի ՀՀ երկրորդ և երրորդ նախագահներին: Բայց ամեն ինչ լավ է լինելու, մեկ վայրկյան անգամ չեմ կասկածում, որ սպանությունների հեղինակները մի օր պատժվելու են»:
