«Ազատություն» ռադիոկայանի փոխանցմամբ, շաբաթ առավոտյան հազարավոր թուրքեր բողոքի զանգվածային ցույց են անցկացրել Փարիզում` Հայոց ցեղասպանությունը ժխտելու համար քրեական պատիժ սահմանող օրինագծի դեմ:
Ըստ ռադիոկայանի, ցույցին մասնակցել են մոտ 5000 հոգի, բայց մասնակիցների թիվը համալրվել է հետզհետե ավելացող ցուցարարներով: Anadolu գործակալությու հաղորդում է, որ բողոքի ակցիային, չնայած անձրևին և եղանակային վատ պայմաններին, մասնակցել է շուրջ 35 հազար մարդ, որոնք փողոց են դուրս եկել Թուրքիայի, Ադրբեջանի և Ալժիրի դրոշներով: Ըստ Nouvelles d’Armenie պարբերականի, ցուցարարների կեսից ավելին ավտոբուսներով բերվել են Հոլանդիայից, Գերմանիայից և Բելգիայից: Ավտոբուսները Ֆրանսիայի սահմաններից ի վեր հսկվել են ֆրանսիական ոստիկանության կողմից մինչև ցույցի վայրը: Ընդհանուր առմամբ ցույցը խիստ հսկողության տակ է գտնվել, նույնիսկ քաղաքացիական հագուստ կրող ոստիկաններ են ցրված եղել ամբոխի մեջ:
Հիշեցնենք, որ օրինագիը Ֆրանսիայի Սենատում քվեարկության կդրվի վաղը՝ հունվարի 23-ին կեսօրից հետո:
