РИА Новости-ի փոխանցմամբ՝ ամերիկացի ծովայինները վերջին մեկ ամսում 3-րդ անգամ են օգնում իրանցիներին։ Երեկ ամերիկյան USS Dewey էսկադրոնային ականակրի նավաստիներն Արաբական ծովում օգնություն են ցուցաբերել իրանցի ձկնորսների խմբին, որոնց նավերը կորցրել էին ղեկավարումը։
Ղեկավարումը կորցրած իրանցի ձկնորսների նավերը նկատել է ամերիկյան մարտական ուղղաթիռը, և այդ մասին զեկուցել էսկադրոնային ականակրի հրամանատարին։ Վերջինս էլ որոնող խումբ է ուղարկել տվյալ շրջան, որտեղ էլ հայտնաբերվել են իրանական նավերը։
Իրանցի մի ձկնորս ասել է, որ իրենց նավակներից մեկը սկսել է սուզվել և իրենք փորձել են կանխել դա։ Սակայն եռօրյա ջանքերն արդյունք չեն տվել, և նրանք տեղափոխվել են մյուս նավի վրա։ Ամերիկացիներն իրանցի ձկնորսներին հատկացրել են սննդամթերք, ջուր և առաջին անհրաժեշտության այլ պարագաներ։
Համոզվելով, որ իրանցի ձկնորսները վտանգի մեջ չեն՝ ամերիկյան փրկարար ջոկատը նրանց հանձնել է մոտ 70 կիլոգրամ պաշար և վերադարձել USS Dewey-ի մոտ։
Հիշեցնենք, որ հունվարի 10-ին ամերիկացիները Պարսից ծոցում ջրասույզ լինող բեռնանավից փրկել էին 6 իրանցիների, իսկ դրանից մի քանի օր անց ծովահենների 40-օրյա գերությունից Արաբական ծովում փրկել էին 13 իրանցի ձկնորսների։
