Հարավային Կովկասում Եվրամիության նախկին հատուկ ներկայացուցիչ Պիտեր Սեմնեբին դարձել է ԱՄՆ-ի Մարշալի գերմանական հիմնադրամի (German Marshall Fund of the United States-GMF) ավագ գիտաշխատող:
Ինչպես հաղորդում է «Մեդիամաքս» գործակալությունը, Պիտեր Սեմնեբիի հետաքրքրությունների ոլորտը նոր պաշտոնում կներառի Սևծովյան տարածաշրջանը, Հարավային Կովկասն ու Ռուսաստանը:
2006-2011թթ. Պիտեր Սեմնեբին զբաղեցնում էր Հարավային Կովկասում Եվրամիության հատուկ ներկայացուցչի պաշտոնը:
2011թ. հոկտեմբերին «Ռուսաստանը համաշխարհային քաղաքականության մեջ» ամսագրում հրապարակված հոդվածում Պիտեր Սեմնեբին գրել էր ԼՂ հակամարտության սուր էսկալացիայի իրական վտանգի առկայության մասին:
«ԼՂ հակամարտության ներքին տրամաբանությունը եւ դինամիկան հղի են լուրջ ռիսկերով: Գոյություն ունի սուր էսկալացիայի իրական վտանգ: Հակամարտության կողմերը խրվել են սպառազինվելու չթուլացող և ապակայունացնող մրցավազքի մեջ:
Առկա է միայն զինադադարի ինքնականոնավորող և անհուսալի համաձայնագիրը` առանց հակամարտող կողմերի սահմանազատման: Դրա պահպանմանը հետևում են միայն մի քանի դիտորդներ ԵԱՀԿ-ից»,- նշում էր ԵՄ նախկին հատուկ ներկայացուցիչը:
«Բրյուսելը հստակորեն հասկացնել տվեց, որ պատրաստ է աջակցել վստահության ամրապնդմանը և ԵԱՀԿ Մինսկի խմբի շրջանակներում ընթացող բանակցություններին: ԵՄ քաղաքականությունը Աբխազիայի և Հարավային Օսիայի նկատմամբ կարելի էր մասնակիորեն օգտագործել ԼՂ կարգավորման գործում, սակայն վստահության բացակայությունը կողմերի միջև մինչ օրս հնարավորություն չտվեց ստեղծել փոխազդեցության համակարգ:
Վստահության ամրապնդման ուղղությամբ մեղմ միջոցներից բացի ԵՄ-ն կարող է գործնական և քաղաքական աջակցություն ցուցաբերել Մինսկի խմբի աշխատանքներին: Մասնավորապես, պետք է ամրապնդել զինադադարի մասին համաձայնությունը»,- նշել էր Պիտեր Սեմնեբին:
«Լեռնային Ղարաբաղի շուրջ ռազմական առճակատման խոչընդոտն աստիճանաբար վերանում է, քանի որ կողմերը շարունակում են զինվել: Փխրուն հավասարակշռությունը, որը հնարավորություն էր տալիս զգալիորեն վերահսկել հակամարտությունը և 15 տարիների ընթացքում կանխել դրա սրումը, առաջիկայում կարող է խախտվել»,- նախազգուշացրել էր եվրոպացի նախկին պաշտոնյան:
Խոսելով ընդհանուր առմամբ Հարավային Կովկասում հակամարտությունների կարգավորման մասին` Պիտեր Սեմնեբին կարծիք էր հայտնել, որ «տարածաշրջանի բնակչությանը հարկավող է մեկ ինքնություն` միմյանց հետ ավելի հաշտ ապրելու համար»:
«Այսօր նրանք ընդհանուր քիչ բան ունեն: ԵՄ-ն կարող է եվրոպական մեծ ընտանիքին պատկանելության նոր ձեւաչափ ավելացնել` օգնելով Հարավային Կովկասի պետություններին դուրս գալ նեղ ազգային ինքնորոշման շրջանակներից, ինչը քաղաքական անկախություն ստանալուց հետո մղվել է առաջին պլան, իսկ այնուհետ ամրապնդվել 1990-ականների պատերազմներով:
Ընդհանուր ինքնությունը Հարավային Կովկասի ժողովուրդներին կօգներ ձեռք բերել համատեղ ձգտումներ` ուժերը հակամարտությունների վրա վատնելու փոխարեն: Բայց դրա համար Բրյուսելը պետք է ցուցադրի իր հետևողական նվիրվածությունն այս տարածաշրջանում բնակվող մարդկանց շահերին, պահանջներին եւ ձգտումներին»,- նշել էր նա: