Հայաստանի, Ռուսաստանի և Ադրբեջանի նախագահների՝ Սոչիում կայանալիք առաջիկա հանդիպումից որևէ լուրջ ակնկալիք չպետք է ունենալ: «Առաջին լրատվական»-ի հետ զրույցում նման տեսակետ հայտնեց քաղաքագետ Ստեփան Գրիգորյանը:
«Այս հանդիպմանն ընդամենը փորձ կարվի վերականգնել ընդհատված բանակցային գործընթացը: Կազանից հետո բանակցային ռեալ գործընթացը դադարեցվեց, և հիմա փորձ է արվելու վերականգնել այն: ՌԴ նախագահ Դմիտրի Մեդվեդևի այս առաքելությունը, սակայն, որևէ արդյունք չի տա: Կարելի է ասել, որ բանակցային գործընթացը շարունակելու է մնալ լճացման փուլում, հակամարտող կողմերի հանդիպումը բեկումնային չի լինելու»,- նկատեց քաղաքագետը:
Հարցին՝ հնարավոր համարո՞ւմ է, որ Վլադիմիր Պուտինի՝ ՌԴ նախագահ ընտրվելուց հետո Հայաստանի, Ռուսաստանի և Ադրբեջանի ղեկավարների ավանդական դարձած եռակողմ հանդիպումների ձևաչափը վերացվի, Ստեփան Գրիգորյանն ասաց. «Ոչ, նման բան հնարավոր չէ: Կարծում եմ՝ Ռուսաստանը կշարունակի պահել ԼՂ հակամարտության հարցում իր հետաքրքրվածությունը»:
Նշենք, որ Սերժ Սարգսյանը, ՌԴ նախագահ Դմիտրի Մեդվեդևի հրավերով, հունվարի 23-ին աշխատանքային այցով կմեկնի Սոչի: Այցի շրջանակներում նախատեսված է Հայաստանի Հանրապետության և Ռուսաստանի Դաշնության նախագահների երկկողմ հանդիպում:
Ինչպես «Առաջին լրատվական»-ին տեղեկացնում են նախագահի մամլո գրասենյակից, նույն օրը տեղի կունենա նաև Հայաստանի, Ռուսաստանի և Ադրբեջանի նախագահների եռակողմ հանդիպում` նվիրված Լեռնային Ղարաբաղի հակամարտության կարգավորմանը: