Երկնաքարային անձրևի նմուշի գինը, որը տեղացել էր 2011 թվականի հուլիսին Մարոկկոյում անապատում, առնվազն տասն անգամ գերազանցել է ոսկուն: Մի քանի ամիս անց փորձաքննությունը ցույց է տվել, որ այս երկնաքարը ծագում է Մարսից: Ենթադրվում է, որ այն ձևավորվել է Կարմիր մոլորակի հետ խոշոր աստղակերպի ընդհարման պատճառով:
Ինչպես հայտնում է ИТАР-ТАСС գործակալությունը, այդ նմուշներին արժեք է տալիս այն հանգամանքը, որ դրանք գտնվել են նախնական տեսքով, այսինքն՝ չեն հասցրել երկար ժամանակ լինել կլիմայի և Երկրի միկրոօրգանիզմների ազդեցության տակ: Նմանատիպ երկնաքարային անձրևները չափազանց հազվագյուտ երևույթ են. մինչ այժմ գրանցվել էին չորս անգամ` 1815, 1865, 1911 և 1962 թվականներին:
Ինչպես երեքշաբթի օրը հայտնել էր Նյու Յորքի Մակովիչի անվան երկնաքարերի հավաքածուի համակարգող Դերիլ Փիթը, Մարոկկոյում հայտնաբերված երկնաքարերի ընդհանուր քաշը առնվազն 11 կգ է: Երկնաքարերի ընդհանուր քաշը, որոնք ծագել են Մարսից և այժմ գտնվում են մեր մոլորակում, կազմում է 100 կգ:
Կախված կառուցվածքից և պահպանված լինելուց` դրանք վաճառվում են թանգարաններին, գիտնականներին և կոլեկցիոներներին (մեկ գրամը 300-1000 դոլարով):
Մարսից եկած երկնաքարերի ուսումնասիրությունը կարող է գիտնականներին կարևոր տեղեկություն տալ Կարմիր մոլորակի, օրինակ՝ նրա մթնոլորտի կազմի, կլիմայի առանձնահատկությունների, օրգանական նյութերի առկայության և ջրի գոյության (ինչը կնշանակի, որ այնտեղ գոյություն ունի նաև կյանք) համար նախապայմանների մասին:
