Մեր գյուղատնտեսությունում այն 10 անգամ զիջում է Իսրայելի գյուղատնտեսության աշխատանքի արտադրողականությանը:
«Հայաստանն իր աշխատուժի արտադրողականությամբ զգալիորեն զիջում է համադրելի երկրների մեծ մասին: Մինչ Հայաստանի միջին աշխատողը տարեկան կտրվածքով արտադրում է 7.930 ԱՄՆ դոլարին համարժեք ապրանքներ և ծառայություններ, Իսրայելում միջին աշխատողի արտադրանքը համարժեք է 68.400 ԱՄՆ դոլարին»,- այս մասին ասված է օրերս «Տնտեսություն և արժեքներ» հետազոտական կենտրոնի հրապարակած Հայաստանի ազգային մրցունակության երրորդ զեկույցում: Այսինքն, միջին հաշվով, Հայաստանում 1 աշխատողը 8.6 անգամ ավելի քիչ արտադրանք է արտադրում, քան Իսրայելում: Սակայն Հայաստանում աշխատուժի արտադրողականությունը անհավասարաչափ է բաշխված նաև տնտեսության տարբեր ճյուղերում: «Հայաստանի աշխատուժն ունի արտադրողականության ամենաբարձր մակարդակը շինարարության ոլորտում`զիջելով Իսրայելին ընդամենը 33 տոկոսով, մինչդեռ գյուղատնտեսության արտադրողականությունը կազմում է Իսրայելի նույն ցուցանիշի 11 տոկոսը»,- ասված է զեկույցում: Նշենք, սակայն, որ Հայաստանի շինարարության ոլորտում աշխատողների մեծ մասը գրանցված չէ, այդ պատճառով էլ գրանցված 1 աշխատողին բաժին ընկնող արտադրանքը բավական մեծ թիվ է կազմում: Ասինքն` իրականում մեր շինարարության ոլորտում ևս աշխատանքի արտադրողականությունը բավական ցածր է: Ինչ վերաբերում է մյուս ճյուղերին, նշենք, որ հանրային կառավարման, կրթության և առողջապահության ոլորտներում աշխատանքի արտադրողականությունը կազմում է Իսրայելի համապատասխան ցուցանիշի 12 տոկոսը, արդյունաբերությունում` 30 տոկոսը, տրանսպորտում ու հեռահաղորդակցությունում` 33 տոկոսը, իսկ ֆինանսական միջնորդության, անշարժ գույքի, վարձակալում և բիզնես ծառայությունների ճյուղում` 56 տոկոսը: Ընդ որում, հետաքրքիրն այն է, որ Հայաստանի աշխատողների մեծ մասը` 62 տոկոսը, զբաղված է ամենացածր արդյունավետություն ունեցող ճյուղերում` գյուղատնտեսությունում ու կառավարման, կրթության և առողջապահության ճյուղերում, մինչդեռ, օրինակ, ֆինանսերի ոլորտում զբաղված է աշխատողների ընդամենը 2 տոկոսը: