«Ես եմ» ֆիլմը Հայոց բանակի 20-ամյակին նվիրված միջոցառումների ամբողջ փաթեթի մի մասն է: Ես և իմ ընկերները այս նախագիծն իրականացրինք 4-5 ամիս առաջ: Այն` իր կոնցեպցիայով, գաղափարախոսությամբ, իր կարգախոսով պետք է ամփոփվի հունվարի 27-ի հոբելյանական տոնահանդեսում ու կազմի մեկ ընդհանուր փաթեթի մի մաս:
Լրագրողների հետ հանդիպմանը տեղեկացրեց Երևանի կինոյի և թատրոնի պետական ինստիտուտի ռեկտոր, «Ես եմ» ֆիլմի պրոդյուսերներից Արմեն Մազմանյանը` անդրադառնալովբանակի 20-ամյակին նվիրված «Ես եմ» ֆիլմի նկարահանումների աշխատանքին:
Նրա խոսքով` ֆիլմով իրենք ուզում էին մեկ անգամ ևս հիշեցնել, որ անկախ այն օբյեկտիվ, իրական, դաժան, ծանր փաստերից` գոյություն ունեն բացարձակ արժեքներ` հայրենիք-զինվոր, որ «միշտ պետք է գովերգվի, փայփայվի», իսկայն նեգատիվիզմը, որ ծնվում է հասարակության մեջ, երբ ծնողը չի ուզում իր երեխային զինվոր տեսնել, և վերջինս էլ չի ցանկանում ծառայել, «համազգային, գլոբալ ռազմավարական պրոբլեմ է»:
Որպես ստեղծված իրավիճակից ելք` վերջինս առաջարկեց մշակել պետական ռազմավարություն, «դասալքությանը, երկրից քոչելուն» հակադրեց «պայքարելն ու կռվելը»:
«Այդպես էր պատվերը «32»-ի տղաներին: Ֆիլմի նպատակն էր ստեղծել էպիկական», գեղեցիկ կինո, պոզիտիվ հեքիաթ»,- հավելեց նա`ընդգծելով, որ այն սերիալները, այն 6,5-7,5-երը, այն քառսունքները, որ մենք ունենք որպես ազատ շուկայի արդյունք` հակակրթություն է:
Վերջինիս խոսքով` դա արգելել հնարավոր չէ, սակայն դրան այլընտրանք, «սերնդին ուղղված մեսիջներ» չունենալը ու կինոլեզվով գեղեցիկի հաղթանակը չմատուցելը անհնար է:
Անդրադառնալով ֆիլմի մեսիջներին` նա ուրախությամբ նշեց, որ մարդիկ «բռնել են մի կոնկրետ նախադասություն», այն է` «սահմանից այս կողմ ես թշնամի չունեմ»:
«Այդ քաղաքական, կուսակցական, մանդատային, օլիգարխական բախումները մեզ չպետք է փչացնեն: Պետք է գիտակցենք, որ մեծ կտորով փոքր երկիր ենք օղակի մեջ` թշնամիներով շրջապատված, և եթե չգիտակցենք, որ թշնամին մեզնից դուրս է և ոչ թե` ներսում, վաղը չէ մյուս օրը, երբ պատերազմ սկսվի, շատերը կմտածեն, որ դա իրենց գործը չէ»,- հավելեց Ա. Մազմանյանը:
Ինչ վերաբերում է երկրորդ մեսիջին, ապա նկատեց` «Ես եմ» արտահայտությունն է: «Ֆիլմը դրա մասին է` ես եմ հայրենիքի զինվորը»,- եզրափակեց վերջինս:
