Եթե համերգը կազմակերպում է քաղաքական ինչ-որ ուժ ու երգիչն էլ քարոզ չի անելու բեմից, դրան վերաբերվում եմ նորմալ, իսկ հակառակ պարագայում՝ երգիչն այդ ուժերի ձեռքին կդառնա գործիք: Այս երկու դեպքում էլ մենք չկանք: «Առաջին լրատվական»-ի հետ զրույցում անկեղծացավ Empiray խմբի վոկալիստ Սարգիս Մանուկյանը` խոսելով նախընտրական թեժ քարոզարշավի շրջաններում երգիչ-երգչուհիների մասնակցությանը տարատեսակ ակցիաներին:
Հարցին` արդյոք Empiray-ն ստացե՞լ է քաղաքական այս կամ այն կուսակցության կամ նախագահական քարոզարշավին մասնակցելու հրավեր, երաժիշտն ասաց, որ իրենք երբևէ չեն ստացել ու ստանալու դեպքում էլ 99 տոկոսով կմերժեն:
Ինչ վերաբերում է երգիչների մասնակցությանը նմանատիպ ակցիաներին, ապա նա նշեց, որ երգիչները միայն ֆինանսի համար են մասնակցում նախընտրական քարոզարշավին և ոչ թե ելնելով քաղաքական գիտակցությունից: «Քանի որ Հայաստանում երգիչներին չորս տարին մեկ են նորմալ վարձատրում, դրա համար էլ մասնակցում են»,- նշեց երգիչը`հավելելով, թե վերջիններս նորմալ վճարվում են հենց նախընտրական շրջանում:
«Չի բացառվում, որ մարդը դիրքորոշում ունենա, դրա համար մասնակցի այդ քաղաքական ուժի նախընտրական պայքարին, բայց դա զանգվածային բնույթ չի կրում: Չեմ հավատում, որ էստրադային երգիչները քաղաքական լուրջ վերլուծություն են անում, նոր մասնակցում քարոզարշավին»,- համոզմունք հայտնեց երգիչը:
Լուսանկարը՝ Bravo.am-ի
