Թուրքական Hürriyet թերթի փոխանցմամբ՝ Թուրք-ֆրանսիական գործարար խորհրդի ղեկավար Յըլմազ Արգյուդենը հայտարարել է, որ Անկարայի կողմից Փարիզի նկատմամբ սահմանվելիք տնտեսական պատժամիջոցները կործանարար հետևանքներ կունենան երկու կողմի համար էլ։
Նա հավելել է, որ այդ պատժամիջոցները կարող են սահմանվել, եթե Ֆրանսիայի Սենատը հունվարի 23-ին ընդունի Հայոց ցեղասպանության հերքումը քրեականացնող օրինագիծը. «Թուրքիան չպետք է կրակի իր ոտքին՝ Ֆրանսիայի Սենատին արձագանքելու դեպքում։ Տնտեսական բոյկոտից կտուժի թե՛ Թուրքիան, թե՛ Ֆրանսիան։
Ինչ վերաբերում է Սենատում այդ օրինագծի ընդունմանը, ապա միայն այն փաստը, որ Ֆրանսիայի նախագահ Նիկոլա Սարկոզին լուրջ ջանքեր է գործադրում այդ ուղղությամբ, բավական մեծացնում է այդ հնարավորությունը»։
Հիշեցնենք, որ ներկայումս թուրք ներկրողները փորձում են փոխանակել ֆրանսիական արտադրողների ապրանքները՝ վախենալով երկրում ֆրանսիական ապրանքների բոյկոտից, ինչը պայմանավորված է երկու երկրների միջև լարվածության պահպանմամբ։
Թուրք սպառողների շրջանում գնալով ավելի է մեծանում ֆրանսիական ապրանք չգնելու ցանկությունը, ինչը հանգեցրել է նրան, որ ներկրմամբ զբաղվող ավելի շատ թուրքական ընկերություններ են բարտերային փոխանակման ուղիներ որոնում՝ ֆրանսիական ապրանքների պաշարներից ազատվելու համար։ Այդ նպատակով նրանք անգամ 15-30 տոկոսով նվազեցրել են դրանց գինը։