«Բարգավաճ Հայաստան» կուսակցության նախընտրական շտաբի ղեկավարի անունը հայտնի կլինի մոտակա օրերին՝ հավանաբար առաջիկա շաբաթվա ընթացքում. «Առաջին լրատվական»-ի հետ զրույցում ասաց ԲՀԿ-ական պատգամավոր Նաիրա Զոհրաբյանը:
« Նախընտրական շտաբի ղեկավարի հարցը դեռևս չենք քննարկել, մենք այժմ աշխատում ենք ԲՀԿ նախընտրական ծրագրի վրա, քանի որ դա ավելի առաջնահերթ և կարևոր ենք համարում: Շատ ավելի էական ենք համարում հանրությանը ներկայացնել, թե ինչ է առաջարկում «Բարգավաճ Հայաստան» կուսակցությունը մոտակա տարիների համար: Ով էլ որ լինի ԲՀԿ նախընտրական շտաբի ղեկավարը՝ միանշանակ է, որ բոլոր խնդիրները ներկայացվելու և հստակեցվելու են բացառապես կուսակցության նախագահ Գագիկ Ծառուկյանի հետ»,- նկատեց Նաիրա Զոհրաբյանը:
Նշենք, որ «Առաջին լրատվական»-ի տեղեկություններով՝ ԲՀԿ նախընտրական քարոզչությունը և միջազգային դիտորդների հետ աշխատանքի պատասխանատվությունը դրվել է հենց Նաիրա Զոհրաբյանի վրա:
