Ամերիկյան «Ժառանգություն» հիմնադրամի (Heritage Foundation) և The Wall Street Journal պարբերականի համատեղ կազմած աշխարհի պետությունների տնտեսական ազատությունների վարկանիշային աղյուսակում Հայաստանը զբաղեցնում է 39-րդ հորիզոնականը:
Հիմնադրամի կայքում նշվում է, որ Հայաստանում տնտեսական ազատությունները գնահատվում են 68.8 միավորով: Սա 0.9 միավորով ցածր է նախորդ տարվա ցուցանիշից, ինչը պայմանավորված է կոռուպցիայի, պետական ծախսերի և դրամավարկային քաղաքականության ազատությունների ոլորտներում իրավիճակի վատթարացմամբ: Նշվում է, որ Հայաստանը եվրոպական 43 երկրների շարքում զբաղեցնում է 19-րդ տեղը:
«Վերջին տասնամյակում շարունակող զգալի ազատությունների և տնտեսական վերափոխումների շնորհիվ համաշխարհային տնտեսական անկման պայմաններում Հայաստանը պահպանում է կայունության չափավոր մակարդակ: Ընդհանուր նորմատիվ-իրավական բազան մնում է արդյունավետ, որը պայմանավորված է բիզնեսի հեշտացված գործընթացով և հարկերի մրցակցային չափերով: Ազատ շուկաները խրախուսող քաղաքականությունը մրցունակ է դարձնում երկրի ներդրումները և առևտրային ռեժիմները»,- ասվում է հոդվածի՝ Հայաստանին վերաբերող հատվածում:
Վարկանիշային աղյուսակում առաջին տեղը զբաղեցնում է Հոնկոնգը՝ 89.9 միավորով: Երկրորդ տեղում Սինգապուրն է, եռյակը եզրափակում է Ավստրալիան: Վարկանիշային աղյուսակն ամբողջությամբ կարող եք տեսնել այստեղ:
Heritage հիմնադրամը ամեն տարի հրապարակում է աշխարհի երկրների տնտեսական ազատությունների աղյուսակը: Գնահատականը տրվում է 4 հիմնական չափանիշներով՝ պետության մասնակցությունը տնտեսական կյանքին, իշխանության մարմինների արդյուանավետությունը, օրենքներին հետևելը և ազատ շուկաների առկայությունը: 80 և ավել միավոր հավաքած տնտեսությունները գնահատվում են ուրպես «ազատ», 70-79.9 միավոր ունեցողները՝ «հիմնականում ազատ», 60-69.9՝ «համեմատաբար ազատ», 60-ից ցածր՝ «հիմնականում անազատ», իսկ 50-ից ցածր՝ «փակ»:
