Ճապոնիան «հստակ քայլերի կդիմի» Իրանից նավթի ներկրումները նվազեցնելու համար: Նման հայտարարությամբ հանդես է եկել Ճապոնիայի ֆինանսաների նախարար Ձյուն Աձումին Տոկիոյում ԱՄՆ ֆինանսների նախարար Թիմոթի Գայթների հետ հանդիպելուց հետո:
Հիշեցնենք, որ Գայթները փորձում էր ստանալ Ճապոնիայի և Չինաստանի աջակցությունը` Իրանի դեմ պատժամիջոցները խստացնելու հարցում: Չորեքշաբթի օրը նա հանդիպել էր Չինաստանի ղեկավարների հետ Պեկինում, բայց նման աջակցություն չէր ստացել:
BBC-ն գրում է, որ մամլո ասուլիսի ժամանակ Աձումին հայտնել է, թե վերջին 5 տարիների ընթացքում իրենք Իրանից ներկրվող նավթի քանակը նվազեցրել են, բայց հստակ քայլերի կդիմեն հետագայում նույնպես կրճատումներ անելու համար:
Հարկ է նշել, որ Ճապոնիան Իրանի նավթի երկրորդ ամենամեծ սպառողն է և արդեն կոչ է արել արաբական երկրներին մեծացնել իրենց նավթի արտահանումը:
Գայթները ողջունել է Ճապոնիայի պատասխանը՝ ասելով, որ ԱՄՆ-ն աշխատում է Եվրոպայի, Ճապոնիայի և այլ դաշնակիցների հետ ամբողջ աշխարհում` Իրանի վրա ճնշումը մեծացնելու նպատակով: