Աստղագետներն այժմ կարծում են, որ մեր գալակտիկայում մոլորակներն իրենց թվով գերազանցում են աստղերին:
Շնորհիվ նոր ու հզոր հեռադիտակների և տարբեր արեգակնային համակարգերի մասին պատկերացումների, գիտնականները նոր վայրեր են հայտնաբերում, որտեղ կարելի է կյանք փնտրել:
Այսօր հրապարակված երեք հետազոտությունները լույս են սփռում մոլորակների համակարգերի բազմազանության վրա: Հետազոտություններից մեկի հաշվարկներով՝ մեր Ծիր Կաթին գալակտիկայում ավելի շատ մոլորակներ կան, քան աստղեր: Ծիր Կաթինն, ըստ հաշվարկների, 100 միլիարդ աստղ ունի:
Associated press-ը գրում է, որ մինչ այժմ գիտնականները կարծում էին, թե երկու աստղերից բաղկացած համակարգերը չափազանց քաոսային են՝ իրենց մեջ մոլորակներ ներառելու համար: Բայց այժմ աստղագետները կարողացել են երեք տարբեր համակարգեր գտնել, որտեղ մոլորակները երկու արև ունեն: Մի քանի տարի առաջ նման գաղափարն ընդամենը երևակայության արդյունք էր թվում:
