Բեռլինի Շլոսպարկ թատրոնին քննադատել են այն բանի համար, որ բեմում հայտնվել է սպիտակամորթ դերասանը սև գրիմով: Այս մասին հայտնում է BBC-ն:
Նախկինում այս հնարքին էին դիմում ԱՄՆ սպիտակամորթ դերասանները` սևամորթ ամերիկացիներին ծաղրելու համար:
Շլոսպարկ թատրոնը որոշել էր սպիտակամորթ դերասանին սևամորթ դարձնել I’m not Rappaport պիեսի բեմադրության համար: Պիեսի գործողությունները ծավալվում են Նյու Յորքում: Այն պատմում է երկու ծերունու` աֆրոամերիկացի Միջ Քարթերի և հրեա Նատա Մոյերի ընկերության մասին:
Շլոսպարկ թատրոնի գլխավոր ռեժիսոր Թոմաս Շենդելն ասում է, որ Բեռլինում չեն գտել հարմար սևամորթ ծերունի դերասանի, այդ պատճառով աֆրոամերիկացու դերը ստանձնել է 76-ամյա սպիտակամորթ Յոահիմ Բլիզեն:
Շենդելի խոսքերով, Բեռլինում սևամորթ մեծահասակ դերասանները իրենց կարիերայի մեծ մասն անցկացրել են երաժշտական արդյունաբերության մեջ և պատրատ չէին թատրոնի բեմում ելույթ ունենալուն: Բացի այդ, նրանցից ոչ մեկը գերմաներեն չէր խոսում առանց ակցենտի:
Թատրոնի ռեժիսորը և այլ ներկայացուցիչներ հերքում են ռասիզմի մեղադրանքները: Թոմաս Շենդելն ասում է, որ այդ մեղադրանքները տխրեցնում են իրեն, քանի որ ինքը փորձել է ռասիզմի մասին պիես բեմադրել, արդյունքում իրեն են մեղադրում ռասիզմի մեջ:
Սակայն «Սևամորթ գերմանացիների» նախաձեռնություն իրավապաշտպան կազմակերպությունը մերժում է այդ արդարացումները: Կազմակերպության ներկայացուցիչ Թահիր Դելի կարծիքով՝ Գերմանիայում բավական շատ սևամորթ դերասաններ կան, հատկապես Բեռլինում: Ըստ նրա՝ Շենդելը պարզապես փորձում է արդարացումներ գտնել:
