Սիրիայի նախագահ Բաշար Ալ-Ասադը վերջին ամիսների ընթացքում առաջին անգամ հանդես է եկել հրապարակավ ուղերձով՝ օտարերկրյա ուժերին մեղադրելով իրենց դեմ կազմակերպված դավադրության մեջ:
«Արտաքին դավադրությունն այլևս գաղտնիք չէ: Այն, ինչ նախկինում գաղտնի էր լինում՝ փակ դռների ետևում, այժմ արդեն ակնհայտն է»,- հայտարարել է Ասադն իր ուղերձում, որն ուղիղ եթերով հեռարձակել է BBC հեռուստաալիքը:
«Տարածաշրջանային և միջազգային ուժերը փորձում են ապակայունացնել իրադրությունը երկրում»,- ասել է նա՝ մեկնաբանելով ՄԱԿ-ի գործունեությունը, որի տվյալներով վերջին 10 ամիսների ընթացքում Սիրիայում սպանվել է ավելի քան 5000 քաղաքացիական անձ: Ընդ որում, նա նշել է, որ արաբական երկրներն իրենց ավելի «թշնակաման են պահում»:
«Մենք զարմացած էինք, որ արաբները չեն պաշտպանում Սիրիային»,- ասել է նա:
Սիրիան, Ասադի խոսքերով, այսօր «իր պատմության մեջ աննախադեպ պայքար է մղում»: Սակայն նա հավատացրել է, որ «հաղթանակը մոտ է»:
Բացի այդ, Սիրիայի նախագահը հայտնել է, որ նոր սահմանադրության ընդունման շուրջ համազգային հանրաքվեն տեղի կունենա մարտին:
Սիրիայում արդեն շուրջ 10 ամիս է չեն դադարում հակակառավարական ժողովրդական ցույցերը, որոնք վերջին ամիսներին ստանում են քաղաքացիական պատերազմի բնույթ: Այժմ Սիրիայում աշխատում է Արաբական պետությունների լիգայի՝ 165 հոգուց բաղկացած դիտորդական խումբը, որի խնդիրն է գնահատել երկրում տիրող իրավիճակը:
