Անցած տարին` քաղաքական իմաստով, դեռևս չի ավարտվել, այն կավարտվի միայն գարնանը կայանալիք խորհրդարանական ընտրություններից հետո: Այսօր կայացած մամուլի ասուլիսին նման տեսակետ հայտնեց քաղաքագետ, «Կովկաս» ինստիտուտի տնօրեն Ալեքսանդր Իսկանդարյանը:
«Անցած տարվա ամենահետաքրքիր երևույթները տեղի ունեցան հայաստանյան ներքաղաքական կյանքում:
Միաժամանակ հատկանշական էին երեք գործընթացներ. առաջինը ոչ իշխանության, ոչ ընդդիմության` մոնոլիտ չլինելու հանգամանքն էր, երկրորդ գործընթացը ընդդիմության և կոալիցիայի միջև` ընտրություններին ընդառաջ խաղի կանոններ մշակելու փորձն էր, և երրորդը` աշխատել, որպեսզի նոր խորհրդարանում օլիգարխներ քիչ լինեն»,- ասաց նա:
Անդրադառնալով ղարաբաղյան հակամարտության կարգավորման հիմնահարցին` Իսկանդարյանը նկատեց, որ այս տարի այդ ոլորտում լուրջ փոփոխություններ չեն լինի, եթե, իհարկե, ֆորս-մաժորային իրավիճակներ չստեղծվեն:
Քաղաքագետը, խոսելով ամերիկաիրանական ներկայիս լարված հարաբերությունների մասին, նշեց, որ երկու երկրների միջև պատերազմ դժվար թե սկսվի, պարզապես ներկայիս վիճակը ԱՄՆ-ի կողմից փորձ է` ճնշելու Իրանի միջուկային ծրագրի զարգացումը: «Ուժային պայքարը նրանց միջև կշարունակվի, սակայն կարծում եմ` այս ամենը պատերազմով չի ավարտվի»:
Անդրադառնալով Ֆրանսիայի Սենատի կողմից Հայոց ցեղասպանության ժխտումը քրեականացնող օրինագծի քննարկմանը` Ալեքսանդր Իսկանդարյանը հայտարարեց, որ տվյալ օրինագիծը Ֆրանսիան կարող է օգտագործել որպես Թուրքիայի վրա ճնշումներ բանեցնելու միջոց: «Ընդ որում, կարծում եմ` այդ օրինագծի ընդունումը լիովին հնարավոր է»,- ամփոփեց քաղաքագետը:
