Վերջին տարիների ընթացքում մեր երկրում արմատացել են Ամանորի կապակցությամբ երկարատև ժամանակաշրջանում ոչ աշխատանքային օրերը: Այն, որ տարվա առաջին ամսվա կեսը ժողովուրդը չի աշխատում, «Ժողովրդի իշխանություն» հասարակական-քաղաքական նախաձեռնության խորհրդի անդամ, տնտեսագետ Մովսես Արիստակեսյանն «Առաջին լրատվական»-ի հետ զրույցում մի կողմից դրական գնահատեց, որ մարդիկ ոգևորվում են տոներից, բայց մի կողմից էլ, նրա կարծիքով, տնտեսությունը, բնականաբար, տուժում է:
«Բայց այն տնտեսությունը կտուժի, որն իրոք գործում է և իրոք կա արտադրական պրոցես: Ցավոք, մեր տնտեսությունը չի դիվերսիֆիկացվել այնպես, որ աշխատող արտադրական ձեռնարկությունները կարողանային աշխատել և ունենալ պարապուրդներ: Նորմալ տեմպերով աշխատող տնտեսության համար, իհարկե, դա վնաս է՝ ունենալ երկար պարապուրդ»,- նշեց Մ. Արիստակեսյանը:
Նա նաև նկատեց, որ ՀՀ քաղաքացիների մոտ 80 %-ի համար հայկական ավանդույթով ամանորյա տոնակատարությունները շատ ծանր հարված են ընտանեկան բյուջեին. «Կարծես լինելով մրցակցության մեջ՝ սեղանը պատշաճ կամ գեղեցիկ ներկայացնելու համար շատերը մտնում են որոշակի պարտքերի մեջ, չիմանալով, թե հետագայում ինչպես պետք է վերադարձնեն: Անկախ փորձագիտական գնահատականներով՝ բնակչության 40-45 %-ը գործազուրկ է, իսկ աշխատողների աշխաավարձը պարզապես «աղքատավարձ» է»: Արիստակեսյանի գնահատականով՝ յուրաքանչյուր հայկական ընտանիք ամանորյա պատշաճ սեղանի համար յուրաքանչյուր շնչի հաշվով մոտ 35 հզ. դրամ պետք է ծախսի:
Անկախ ամեն ինչից, շնորհավորելով ՀՀ քաղաքացիներին, Մ. Արիստակեսյանը լավ տարի ու արժանապատիվ կյանք մաղթեց:
