ИТАР-ТАСС-ի փոխանցմամբ, ԱՄՆ-ը շարունակելու է Իրանի կառավարության վրա ճնշումներ բանեցնել այնքան ժամանակ, քանի դեռ չի լուծվել Իրանի միջուկային ծրագրի հարցը։ Այս մասին հայտարարել է ԱՄՆ Պետդեպարտամենտի պաշտոնական ներկայացուցիչ Վիկտորյա Նուլանդը։
Վերջինս «հուսահատության ժեստ» է որակել վաղը մեկնարկելիք Իրանի նախագահ Մահմուդ Ահմադինեժադի լատինաամերիկյան շրջագայությունը, որի շրջանակներում նա պետք է այցելի Վենեսուելա, Նիկարագուա, Կուբա և Էկվադոր։
Նուլանդը հայտարարել է. «Թեհրանը նոր դաշնակիցների հուսահատ փնտրտուքի մեջ է, քանի որ նրա վրա գործադրվող միջազգային ճնշումները գնալով ուժգնանում են։ ԱՄՆ-ը իր կողմից չի դադարում հիշեցնել բոլոր երկրների իշխանություններին, որ այժմ Իրանի հետ երկկողմանի հարաբերությունների ամրագրման հարմար ժամանակներ չեն։ Դա մասնավորապես վերաբերում է տնտեսական ու անվտանգության ոլորտներին։
Միջազգային հանրության առաջադրանքը Թեհրանին ցուցադրելն է, որ նա ընտրություն կատարելու հնարավորություն ունի. կա՛մ իսլամական հանրապետությունը կմնա մեկուսացման մեջ, կա՛մ կկատարի իր պարտավորությունները և կսկսի համագործակցել այլ երկրների հետ։ Մենք չենք դադարեցնի Իրանի վրա ճնշումներն այնքան ժամանակ, քանի դեռ չի կարգավորվել նրա միջուկային ծրագրի հարցը։
Աշխարհի երկրները պետք է հայտնեն Իրանի վերաբերյալ իրենց դիրքորոշումը։ Իրանին մեկուսացված վիճակում պահելու համար համաշխարհային պետությունները պետք է հարգեն միջազգային կանոնները»։