Չինական ԶԼՄ-ները քննադատել են ԱՄՆ նոր պաշտպանական ռազմավարությունը, որով նախատեսվում է ավելացնել ռազմական ներկայությունն Ասիայում: Չինական պարբերականներից մեկի տվյալներով, ԱՄՆ-ը տարածաշրջանում տիրող անկայուն իրավիճակի «գլխավոր մեղավորն է»:
«Երբ 2009թ. ԱՄՆ-ը վերստին սկսեց խոսել Ասիա վերադառնալու անհրաժեշտության մասին, տարածաշրջանում սկսեցին տեղի ունենալ իրադարձություններ, որոնք սպառնալիք են ներկայացնում նրա անվտանգությանը»,- ռազմական փորձագետի խոսքերն է մեջբերում չինական պարբերականը: Նրա կարծիքով, դժվար չէ ենթադրել, թե ով է տարածաշրջանում անվտանգության իրական «երաշխավորը», և ով՝ «բոլոր դժբախտությունների աղբյուրը»: Սակայն Reuters գործակալությունը նշում է, որ դա չի արտահայտում Չինաստանի իշխանությունների պաշտոնական դիրքորոշումը, բայց ընդհանուր առմամբ արտացոլում է երկրի կառավարող շրջանակների տրամադրությունները:
Չինական ԶԼՄ-ների նման հրապարակումները լույս տեսան այն բանից հետո, երբ ԱՄՆ նախագահ Բարաք Օբաման հայտարարեց, որ պատրաստվում է ավելացնել ռազմական ներկայությունն Ասիայում, ինչը պայմանավորված է նոր պաշտպանական ռազմավարությամբ: