Իրանական Mehr News լրատվական գործակալության փոխանցմամբ, Իրանի նախագահ Մահմուդ Ահմադինեժադը երեքշաբթի օրը կանչվել է Մեջլիս՝ պատգամավորներին հուզող խնդիրների շուրջ պարզաբանումներ տալու համար։
Նշվում է, որ Մեջլիսում ներկայացված դիմումի տակ ստորագրել է 73 խորհրդարանական, որոնք Ահմադինեժադին մեղադրում են 10 խախտում գործելու մեջ։
Հիշեցնենք, որ Իրանի Սահմանադրության համաձայն՝ երկրի նախագահը պարտավոր է ներկայանալ Մեջլիս և պարզաբանումներ տալ, եթե դա պահանջում է խորհրդարանականների 25 տոկոսը։ Բացի այդ, կիրակի օրը մեկնարկելու է Ահմադինեժադի լատինաամերիկյան շրջագայությունը և երեքշաբթի օրը նա պետք է գտնվի Նիկարագուայում։
Ի դեպ, նախորդ տարվա հունիսին 100 իրանցի խորհրդարանականներ ստորագրել էին նախագահին Մեջլիս հրավիրելու դիմումի տակ, սակայն հետագայում նրանց մի մասը հետ վերցրեց ստորագրությունը, որը հանգեցրեց այդ հարցում քվորումի բացակայությանը։
