Գերմանիայի իշխանությունները համակարգված վերահսկողություն են սահմանելու հակաիսլամական կայքերի վրա, որպեսզի հետևեն օրենքի խախտումներին: Այս մասին հայտնում է Sueddeutsche Zeitung թերթը` վկայակոչելով սահմանադրության պաշտպանության հարցերով Դաշնային գերատեսչության հայտարարությունը:
Իշխանություններին այս որոշումը կայացնելուն դրդել է ահաբեկչությունը, որն իրականացրել էր նորվեգացի Անդերս Բրեյվիկը 2011 թվականի հուլիսի 23-ին` Օսլոյում և Ուտեյա կղզում, որի հետևանքով մահացավ 77 մարդ: Բրեյվիկը հաճախ օգտվել է այն կայքերից, որոնք քարոզում են «Եվրոպան առանց իսլամի» գաղափարը:
Աշնանը Գերմանիայի դաշնային կառավարությունը և շրջանային իշխանությունները ստեղծել էին աշխատանքային խումբ, որը պետք է պարզեր, թե արդյոք հակաիսլամական կայքերում առկա՞ են օրենսդրության խախտումներ: Ստուգումների արդյունքում պարզվել է, որ որոշ նմանատիպ ռեսուրսներ «ոտնձգություններ են թույլ տալիս մարդու իրավունքների դեմ, որոնք պաշտպանված են սահմանադրությամբ»:
