РБК-ի փոխանցմամբ՝ թուրքական իշխանությունները մտադիր են ԱՄՆ-ի հետ պայմանավորվածության հանգել երկրում իրանական նավթի խոշորագույն ներկրող Tupras օպերատորի պաշտպանության շուրջ։ Խոսքը նախորդ տարվա դեկտեմբերի 31-ին Իրանի նկատմամբ ԱՄՆ-ի սահմանած նոր պատժամիջոցների մասին է։
Թուրքիայի էներգետիկայի նախարարության անանուն աշխատակիցը հայտնել է, որ իրենց նախարարության և ԱՄՆ դեսպանատան միջև առաջիկա խորհրդակցության օրակարգի գլխավոր հարցը լինելու են ամերիկյան պատժամիջոցները։
Հիշեցնենք, որ օրեր առաջ ԱՄՆ-ի սահմանած այդ պատժամիջոցները կոչված են նավթի առևտրից Իրանի ստացվող շահույթի կրճատմանը։ Դրանց համաձայն՝ այն ֆինանսական ինստիտուտներն ու ընկերությունները, որոնք կշարունակեն համագործակցել Իրանի Կենտրոնական բանկի հետ, ավտոմատ ձևով կզրկվեն ամերիկյան բանկային համակարգ մուտք գործելու թույլտվությունից։
Ավելի վաղ Թուրքիայի էներգետիկայի և բնական պաշարների նախարար Թաներ Յըլդըզը հայտարարել էր, որ Tupras-ը շարունակելու է Իրանից նավթ գնել այնքան ժամանակ, քանի դեռ «իրավիճակը չի փոխվել»։
