Գործարարները վերջերս բավականին լավ են գնահատում մաքսային ոլորտում իրականացված բարեփոխումները: Նման կարծիք «Առաջին լրատվական»-ի հետ զրույցում հայտնեց ՀՀ արդյունաբերողների և գործարարների միության գործադիր տնօրեն Էդուարդ Կիրակոսյանը, միաժամանակ փաստելով, որ խնդիրներ դեռ շատ կան:
«Հիմնական հարցն այն է, որ հսկիչ գների խնդիրը դեռ ոչ մի կերպ չի լուծվում, որ ինվոյսային գներով հաշվեն: Ներմուծվող շատ ապրանքներ ոչ թե ինվոյսային գներով են հաշվարկում, այլ քաշով և այլն»,- ասաց Է.Կիրակոսյանը:
Նրա խոսքով, մաքսային ձևակերպումներն արվում են բրոքերների միջոցով և առանց նրանց հնարավոր չի անել: Սակայն թե ինչո՞ւ առանց բրոքերի մասնակցության մաքսային ձևակերպումներ չի իրականացվում, թեև դա օրենքով սահմանված չէ, պարզ չի նաև միության գործադիր տնօրենի համար. «Դրա շուրջ մեզ մոտ քննարկում չի եղել, կազմակերպությունները դեռ նման հարց չեն բարձրացրել: Բայց այդ հարցն ինձ էլ հետաքրքրեց»,- նշեց Է.Կիրակոսյանը՝ հավելելով, որ բրոքերների ծառայությունները բավականին թանկ են: