«Վահրամ Ներսիսյանցի` որպես տնտեսագետի մասին վատ բան ասել չեմ կարող»,- պատասխանելով Վ. Ներսիսյանցին Համահայկական բանկի նախագահ նշանակելու վերաբերյալ հարցին` այսօր ասաց ՀՀ նախկին վարչապետ Հրանտ Բագրատյանը: «Չնայած Ռոբերտ Քոչարյանի և Սերժ Սարգսյանի գլխավոր խորհրդականն է եղել, իսկ հիմա արդեն Սերժ Սարգսյանի թիմը խոստովանում է, որ Քոչարյանի ժամանակ զարգացում չի եղել, այդ երկնիշ աճը էներգատարության աճի հաշվին է եղել: Դա էլ մենք վերլուծեցինք, նոր սկսեցին հասկանալ, թե ոնց է եղել, որ երկնիշ աճ եղել է, բայց կենսամակարդակը չի աճել: Համենայնդեպս` կենսամակարդակով Վրաստանը եկել մեզ անցել է` առանց ՀՆԱ երկնիշ աճի: Սա իր հստակ տնտեսագիտական բացատրությունն ունի»,- ասաց Բագրատյանը` հավելելով, որ իրեն ավելի շատ «Համահայկական բանկ» կառույցի կարգավիճակն է անհանգստացնում: «Սա սխալ կառույց է: Այո, 1992-ին, երբ դեռ վարչապետը ես չէի, և կազմում էինք ընդհանուր զարգացման ծրագիր, եղել է այդ գաղափարը` և՛ Հայաստան հիմնադրամի, և՛ համահայկական բանակի: Սակայն այն ժամանակ մենք դեռ երիտասարդ էինք, չէինք կարող 15 տարի առաջ տեսնել: Դրանից տառացիորեն մի քանի տարի հետո ես հասկանում է, որ Հայաստան համահայկական հիմնադրամը պետք է վերափոխվի, այդ կառույցը խոր ճգնաժամի մեջ է, հավաքում է տարեկան 10-15 մլն դոլար ու վերջ: Հայությունն այսօր աշխարհում տնօրինում է 800 մլրդ դոլար կապիտալ, որը կազմում է աշխարհի կապիտալի 0.7-0.8%-ը: Մինչդեռ համայն հայությունը կազմում է աշխարհի բնակչության 0.015%-ը: Եվ այդ 800 մլրդ-ից կարողանում ենք ներգրավել տարեկան 10-15 մլն: Շատ պարզ բացատրություն ունի` մեկ անգամ կարելի է նվիրաբերել, հետագայում պետք է Հայաստան հիմնադրամը վերափոխվեր ինվեստիցիոն հիմնադրամի»,- ասաց Հ. Բագրատյանը` հավելելով, որ, իր կարծիքով, մեզ պետք է ինվեստիցիոն համահայկական բանկ ստեղծել: «Որպես սովորական բանկ, որը գրանցվում է ՀՀ ԿԲ-ում և գործում է նորմատիվային այն դաշտում, որում գործում են մնացած 22 բանկերը, նա միայն կխանգարի մյուս բանկերին, որովհետև նրան տվել են համահայկական անունը, ուզում են 100 մլն դոլար փող տալ: Բյուջեից են տալու դա: Սա չստացված թոշակ է ժողովրդի համար: Նման ծրագրերին պետք է զգույշ մոտենալ: Հիմա սրա վրա խոթելու են ամեն տեսակի ոչ շահութաբեր ծրագրեր ու ամեն տարի «սպիսատ» են անելու այդ փողերը: Ես ամենևին չեմ ակնարկում գողությունը, բայց ես ակնարկում եմ այն, որ նման կարգավիճակում հիմա ոչ ոք բանկ չի ստեղծում»,- եզրափակեց նախկին վարչապետը:
