Թուրքական Taraf թերթի փոխանցմամբ՝ իրաքյան հակամարտության սրումը ծանր հարված է Թուրքիայի տնտեսական ու քաղաքական շահերին։ Այն բանից հետո, ինչ Սիրիան թուրքական ապրանքների տարանցման առջև փակեց իր սահմանները, Իրաքը դարձավ դեպի Մերձավոր Արևելք թուրքական արտահանման միակ երթուղին։
Մինչդեռ ներկայումս Հարավային Իրաքով անցնող այդ երթուղին այլևս անվտանգ չէ։ Թուրք քաղաքագետ Մենսուր Աքգյունը զգուշացնում է, որ Իրաքի հարավով անցնող այդ երթուղու փակման և երկրի փլուզման դեպքում Թուրքիան այլ ելք չի ունենա, քան Քրդստան անկախ պետության ճանաչումը։
Ըստ նրա՝ իրաքյան պետության կրախի դեպքում Թուրքիան պետք է ճանաչի այդ երկրի հյուսիսում ձևավորվելիք անկախ քրդական պետությունը։ Դրա համար էլ հետամերիկյան դարաշրջանում Իրաքի նկատմամբ թուրքական հիմնական ջանքերն ուղղվելու են այդ պետության միասնության պահպանմանը։
