Ամերիկյան արտաքին քաղաքականության գաղափարախոսներից մեկը՝ Զբիգնև Բժեզինսկին, կարծում է, որ ԱՄՆ գլոբալ նշանակության անկումը հղի է տարածաշրջանային հակասություններով:
Foreign Policy ամսագրի հոդվածում նա թվարկում է 8 երկիր, որոնք կտուժեն ԱՄՆ թուլացումից:
Քաղաքագետի կարծիքով՝ Վրաստանը խոցելի կդառնա Ռուսաստանի կողմից քաղաքական ահաբեկչությունների և ռազմական ագրեսիաների առաջ: «Ի՞նչ է դա սպառնում. Ռուսաստանի իշխանությունը Եվրոպա նավթի և գազի մատակարարման հարավային «միջանցքի» վրա, հնարավոր ճնշման ուժեղացում Եվրոպայի վրա, որպեսզի նա համակերպվի Մոսկվայի քաղաքական նպատակների հետ, «դոմինոյի էֆեկտ» Ադրբեջանում»,- ասվում է հոդվածում:
Հաջորդ երկիրը, որը կտուժի ԱՄՆ թուլացումից, ըստ Բժեզինսկու՝ Թայվանն է, որը խոցելի կդառնա Չինաստանի ճնշումների դեմ:
Հարավային Կորեան, նախկին քաղաքագետի կարծիքով, կհայտնվի երկընտրանքի առաջ. հաշտվել տարածաշրջանպում Չինաստանի գերակա դիրքի հետ, կամ ամրապնդել հարաբերությունները Ճապոնիայի հետ: «Ի՞նչ է դա սպառնում. Կորեական թերակղզում վտանգ ռազմատնտեսական կայունության համար, Ճապոնիայի և Հարավային Կորեայի վստահության ճգնաժամ ԱՄՆ-ի պարտավորությունների նկատմամբ»:
Բացի այդ, Բժեզինսկին կարծում է, որ «Ամերիկայի զգալի անկումը Ռուսաստանին հնարավորություն կտա, առանց որևէ ռիսկի, կլանել Բելառուսը», ինչը կխարխլի Բալթյան երկրների անվտանգությունը:
Բժեզինսկու կարծիքով՝ ԱՄՆ թուլացումից տուժող հաջորդ երկիրը կլինի Ուկրաինան, քանի որ Եվրոպայում կմարի ցանկությունը այդ երկիրն ինտեգրել եվրոպական հասարակության մեջ: «Ի՞նչ է դա սպառնում. Ռուսաստանի կայսերական ամբիցիաների աճ»,- գրում է հեղինակը:
Աֆղանստանը, հեղինակի կարծիքով, կհայտնվի ողբերգական վիճակում, ինչի հետևանքով կակտիվանա «Թալիբանը» և միջազգային ահաբեկչությունը:
Պակիստանը, Բժեզինսկու կարծիքով, ԱՄՆ թուլացումից հետո կարող է անցնել զինվորականների ղեկավարության տակ և վերածվել իսլամիստական պետության:
Բացի այդ, ԱՄՆ անկումը զգալիորեն կխարխլի Իսրայելի դիրքերը, քանի որ այն իսկական «տեկտոնական շարժեր» կառաջացնի, որի հետևանքով կխաթարվի Մերձավոր Արևելքի քաղաքական կայունությունը: «Ի՞նչ է դա սպառնում. Իսրայելի կամ ԱՄՆ-ի ուղղակի բախում Իրանի հետ, իսլամիստական ծայրահեղականության աճ, հմաշխարհային նավթագազային ճգնաժամ, խոցելի կդառնան Պարսից ծոցում ԱՄՆ դաշնակիցները»,- ասվում է հոդվածում:
