Թուրքական Zaman թերթի փոխանցմամբ՝ 2011 թվականին Թուրքիան իր պատմության ընթացքում արտահանման ոլորտում ռեկորդային ցուցանիշ է գրանցել։ 2011 թվականին թուրքական արտահանումը, 2010 թվականի համեմատ, աճել է 18.2 տոկոսով՝ հասնելով 134.6 միլիարդ դոլարի։
Դրանով իսկ գերազանցվել է 2008 թվականի (գլոբալ տնտեսական ճգնաժամից առաջ) ռեկորդը՝ 132 միլիարդ դոլար։ Թուրքական արտահանման մեջ նվազել է եվրոպական մասնաբաժինը։ Եթե 2002 թվականին ԵՄ-ին բաժին էր ընկնում արտահանման 57 տոկոսը, ապա 2011 թվականին՝ 46.6 տոկոսը։
Հիշեցնենք, որ այս տարվա հունիսի 12-ին տեղի ունեցած Թուրքիայի խորհրդարանական ընտրությունների նախաշեմին Թուրքիայի վարչապետ Էրդողանի գլխավորած «Արդարություն և զարգացում» կուսակցությունը (ԱԶԿ) թողարկել էր երկու գրքույկ, որոնցից մեկում նշված էր ԱԶԿ-ի իշխանության 8.5 տարիներին Թուրքիայի ունեցած ձեռքբերումների մասին, իսկ մյուսում՝ մինչև 2023 թվականը (Թուրքիայի Հանրապետության հիմնադրման 100-ամյակ) Թուրքիայի ունենալիք ձեռքբերումների մասին։
Ըստ դրանց՝ թուրքական արտահանումը 2023 թվականին կազմելու է 500 միլիարդ դոլար։ Մինչ այդ՝ 2015 թվականին, թուրքական արտահանումը հասցվելու է 201 միլիարդ դոլարի, իսկ 2019 թվականին՝ 317 միլիարդ դոլարի։
Ուշագրավ է, որ երբ 2002 թվականին ԱԶԿ-ն եկավ իշխանության, թուրքական արտահանումը կազմել էր ընդամենը 36 միլիարդ դոլար։
