Թուրքական Cumhuriyet թերթի փոխանցմամբ՝ ներկայումս Թուրքիայում քննարկվում է Ֆրանսիայի Սենատի կողմից Հայոց ցեղասպանության հերքումը քրեականացնող օրինագծի ընդունման կանխման վերաբերյալ քայլերը։ Այդ նպատակով օրակարգում է հայտնվել Փարիզից հետ կանչված դեսպան Թահսին Բուրջուօղլուի վերադարձը։
Նշվում է, որ Բուրջուօղլուն կարող է Փարիզ վերադառնալ մինչև հունվարի 10-ը։ Այդ հապճեպության պատճառն այն է, որ արդեն հունվարի 10-ից փետրվարի 22-ն ընկած ժամանակահատվածում Ֆրանսիայի Սենատը նստաշրջան է ունենալու, ուր և քննարկվելու է Հայոց ցեղասպանության հերքումը քրեականացնող օրինագիծը։
Այդ օրինագծի ընդունումը կանխելու համար թուրքական կողմն անհրաժեշտ է համարում Բուրջուօղլուի վերադարձը, որը Ֆրանսիայում մի շարք հանդիպումներ է անցկացնելու այդ ուղղությամբ։
Հիշեցնենք, որ Բուրջուօղլուն Ֆրանսիայից Թուրքիա էր վերադարձել նախորդ տարվա դեկտեմբերի 23-ի առավոտյան։