«Ընդհանուր առմամբ` տարին հոգեբանական առումով լարված չէր: Հասարակության զարգացման էտապը կարող է գնահատվել հոգեբանության մեջ, ու եթե վերցնենք վերջին 5 տարին, ապա պետք է նշենք այն դրական իրադարձությունները, որ բարձրացրին ազգի ոգին` Ֆրանսիայի կողմից Ցեղասպանության մերժումը քրեականացնող օրենքի ընդունումը, զորահանդեսը, մարզական նվաճումները»,– «Առաջին լրատվական»-ի հետ զրույցում ասաց հոգեբանական գիտությունների դոկտոր, ՀՊՄՀ զարգացման և կիրառական հոգեբանության ամբիոնի վարիչ, հոգեթերապևտ, հոգեբան Սամվել Խուդոյանը:
«Ընդհանուր առմամբ` հարաբերական առումով հանգստ տարի էր, ժողովրդի մեջ տագնապը մեծ չէր՝ համեմատած` պատերազմական տարիների հետ»,- նշեց հոգեբանը` հավելելով, թե մի քիչ արդարություն է նկատվում:
Հարցին` արդյո՞ք բանակում վերջին շրջանում պատահող սպանություններն ու ինքնասպանությունները բացասաբար չեն ազդում հասարակության հոգեբանության վրա, նա ասաց, որ առաջ այդ թեմաների վրա աչք էին փակում կամ խորհրդային շրջանում լրագրողները չէին գրում, իսկ հիմա ավելի ուշադիր են այդ դեպքերի նկատմամբ:
«Բայց այդ դեպքերը հասարակության վրա էական ազդեցություն չեն կարող ունենալ: Իհարկե, բանակի վատ վիճակը ժողովուրդը բացասաբար կարող է ընկալել, բայց բացասական վերաբերմունքը գալիս է ավելի շատ իշխանությունների նկատմամբ ունեցած բացասական վերաբերմունքից»,- նկատեց Ս. Խուդոյանը` հավելելով, որ հասարակության հոգեբանության վրա ազդող ցնցող դեպքերն, օրինակ, երկրաշարժերն են, պատերազմները:
