2011 թվականը տոտալ կորուստների տարի էր, որի հանրագումարը իր երկու հայտնի հարցազրույցներով տվեց աշխարհահռչակ հայազգի շանսոնյե Շառլ Ազնավուրը: «Առաջին լրատվական»-ի հետ զրույցում նման տեսակետ հայտնեց Հայ ազգային կոնգրեսի ներկայացուցիչ Գուրգեն Եղիազարյանը:
«Մեծ շանսոնյեն կարճ ու միանշանակ հայտարարեց, որ մաֆիան և հանցագործ խմբավորումները հայաթափում են Հայաստանը: Նա իր երկրորդ հարցազրույցում ուղղակիորեն ասաց, որ հայրենիքը լքել ստիպում են երիտասարդությանը:
Ինչ վերաբերում է անցնող տարում իրականացված արտաքին քաղաքականությանը, ապա մենք զգալի կորուստներ ունեցանք ինչպես թուրքերի հետ հարաբերությունների կարգավորման գործընթացում, այնպես էլ ղարաբաղյան հարցում, որը մտավ մի այնպիսի փակուղի, որից դուրս գալ կարող ենք միայն կորուստներով: Վերջին 10 տարվա ընթացքում ոչինչ չի արվել, որ մենք կարողանանք լուծել հիմնահարցը: Կարևոր հարցերից մեկն այն է, որ ԼՂՀ-ն այդպես էլ դուրս մնաց բանակցային գործընթացից, և Հայաստանը վերջնականապես ագրեսոր ճանաչվեց: Բացի այդ, կարող եմ ասել, որ նույն հայաթափումը կատարվում է նաև Լեռնային Ղարաբաղում»,- ամփոփեց Գուրգեն Եղիազարյանը:
