2011թ.-ը հայաստանյան ՏՏ ոլորտի համար նշանավորվեց ՀԲ և ՀՀ կառավարության կողմից «Էլեկտրոնային Հայաստան և ինովացիաներ մրցունակության համար» վարկային ծրագրի վավերացմամբ: ՀՀ էկոնոմիկայի նախարարի խորհրդական Վահե Դանիելյանն «Առաջին լրատվական»-ի հետ զրույցում նշեց, որ դրա բաղադրիչ՝ «Համակարգիչ բոլորի համար» պիլոտային ծրագրի ամփոփմամբ արձանագրվեց, որ դեռ հիմնական փուլը չանցած՝ օպերատորները և ՏՏ խոշոր ընկերությունները ձևավորեցին սեփական առաջարկներ: «Ամբողջ անհրաժեշտ փաստաթղթերը պատրաստվել են, որ հաջորդ տարի լինի լուրջ մեկնարկային փուլ»,- նշեց Վ. Դանիելյանը:
ՀԲ վարկային ծրագրի որոշ ուղղություններ արդեն սկսվել էին` կար էլեկտրոնային ստորագրության համակարգը, և հիմա ներդրվում է հավաստագրման համակարգը: Հաջողություններ եղան համազգային լայնաշերտ ցանցի մասով, բանակցությունները վերջին փուլում են, որը կառավարման և ծառայությունների մատուցման նոր տեխնոլոգիաներ կբերի: Վ. Դանիելյանը նշեց, որ մեծ հաջողություն է, որ բացի Գյումրիի տեխնոպարկից, ՀՀ-ում բացվում են այլ ՏՏ և ՏՏ վերապատրաստման կենտրոններ` «Մայքրոսոֆթ» ընկերության ինովացիոն կենտրոնը, հայ-հնդկական կենտրոնը, որտեղ գտնվում է տարածաշրջանում միակ սուպերհամակարգիչը, նաև դասընթացներ են նախատեսվում:
Վ. Դանիելյանի խոսքով, 2011-ին «Մայքրոսոֆթ» ինովացիոն կենտրոնին զուգահեռ բացվեց մոբայլ լաբորատորիան: «Դ-լինկ» ընկերությունը հետազոտական լաբորատորիա բացեց Գյումրիի տեխնոպարկի շրջանակներում, և որոշվեց Երևանում ու Գյումրիում մեծ հետազոտական կենտրոններ բացել և մեծացնել աշխատակազմը:
«Բեկումնային էր տարին»,- ասաց նա` նշելով, որ բանակցություններ են գնում, թե հաջորդ սերնդի ռեֆորմները որոնք պետք է լինեն, որ ապահովեն ճյուղի մակարդակի աճ: Այս պարագայում առաջ եկավ տեխնոլոգիական համալսարանի գաղափարը՝ Հայաստանի ազգային ճարտարագիտական համալսարանի հենքի վրա: ««Նոկիա» և «Մայքրոսոֆթ» կենտրոնի հետ ստեղծվելիք այդ շենքը կլինի աշխարհի կտրվածքով բարձր մակարդակի լաբորատորիա»,- ասաց Վ. Դանիելյանը:
