ՀՀ դրամը դեռ արժևորված է, և սպասումներ կան, որ դոլարի մեղմ արժևորումը կշարունակվի նաև 2012 թ. ընթացքում: FOREX Club-ի վերլուծաբան Միքայել Վերդյանն «Առաջին լրատվական»-ի հետ զրույցում նշեց, որ հունվարին սպասվում է տրանսֆերտների ծավալների նվազում, քանի որ պատմականորեն 11 տարվա ընթացքում տրանսֆերտների ամենացածր նիշը լինում է հունվարին:
«Դա կնպաստի, որ դոլարի արժևորումը մի փոքր արագանա, բայց դոլարի արժևորման հիմնական պատճառն արտաքին շուկաներում տեղի ունեցող իրադարձություններն են, որ քաղաքացիների կողմից սպասվող երկրորդ ճգնաժամն ավելացրել է դոլարի նկատմամբ պահանջարկը և, կարծում ենք, որ արժևորումը հունվարին տեղի կունենա»,- ասաց Մ. Վերդյանը:
Վերլուծաբանի խոսքով` կտրուկ փոփոխություններ չեն սպասվում, մակարդակը, որ կարելի է հաջորդ ամսվա համար նշել, 390-395 դրամ գնային դիապազոնն է. «Դրանից բարձր արժևորում դեռ չենք սպասում հունվարին, և այս պահին շուկան հավասարակշռված է այնքանով, որքանով կտրուկ ցնցումներ կամ արտառոց իրադարձություններ չունենք, և ամեն ինչ ընթանում է բնականոն հունով»:
