Թբիլիսի. «Վրաց ընդդիմադիրները Ռուսաստանի միջոցով քաղաքական կյանքում հաստատվելու փորձ են անում»

Վրաստանի վերաինտեգրման հարցերով պետնախարար Եկատերինա Տկեշելաշվիլին, մեկնաբանելով Մոսկվայի Պոկլոննայա լեռան վրա «Փառքի հուշարձանի» նմանօրինակի բացմանը վրաց ընդդիմադիր գործիչների մասնակցությունը, հայտարարել է, որ դա Ռուսաստանի հետ ակտիվ շփումների շնորհիվ քաղաքական կյանքում հաստատվելու փորձ է,- հայտնում է Новости-Грузия:
«Մեր հասարակության համար արդեն նորություն չէ, որ գոյություն ունեն որոշակի կատեգորիայի քաղաքական գործիչներ, որոնք չեն խուսափում զավթիչ պետության հետ իրենց կապերը բացահայտորեն ցուցադրել»,- ասել է Տկեշելաշվիլին: Ըստ որում, նա ասել է, որ չի պատրաստվում լուրջ մեկնաբանություններ անել դրա շուրջ: «Շատ ափսոս, որ նրանք փորձում են Վրաստանում ինքնահաստատվել՝ օգտագործելով նման կապեր ու նման քաղաքականություն»,- ընդգծել է պետնախարարը:
Հիշեցնենք, որ հուշարձանի բացմանը մասնակցելու նպատակով Մոսկվա էին հրավիրվել Վրաստանի խորհրդարանի նախկին խոսնակ Նինո Բուրջանաձեն և հանրապետության նախկին վարչապետ Զուրաբ Նողաիդելին: Վրաստանի մշակույթի և հուշարձանների պահպանության նախարար Նիկոլոզ Ռուռուան Մոսկվայի Պոկլոննայա լեռան վրա «Փառքի հուշարձանի» նմանօրինակի բացմանը վրաց ընդդիմադիրների մասնակցությունը գնահատել էր որպես «լկտիության ու ցինիզմի օրինակ»:
Օրերս ՌԴ վարչապետ Վլադիմիր Պուտինը, ելույթ ունենալով «Ֆաշիզմի դեմ պայքարում մենք միասին էինք» հուշարձանի բացման արարողությանը, հայտարարել էր, որ ռուս-վրացական հարաբերություններն ապագայում կլինեն բարիդրացիական, իրապես գործընկերային: «Համոզված եմ, որ ոչ ոք ի զորու չէ գժտեցնել Ռուսաստանի և Վրաստանի ժողովուրդներին, խախտել ավանդաբար մեզ կապող մարդկային ամուր հոգևոր կապերը»,- ասել է Պուտինը՝ հավելելով. «Մեզ համար ռուս-վրացական բարեկամությունը հսկայական, անվերապահ արժեք է»,- ընդգծել Է ՌԴ կառավարության ղեկավարը: