Թուրքական Vatan թերթի փոխանցմամբ՝ Թուրքիայում ահաբեկչական հռչակված և արգելված Քրդստանի աշխատավորական կուսակցությունը (PKK) կանգնած է պատմական որոշում ընդունելու նախաշեմին։
Հետախուզական տվյալները վկայում են, որ PKK-ի հիմնադիր Աբդուլլահ Օջալանի ձերբակալության պայմաններում PKK-ի փաստացի առաջնորդ Մուրադ Քարայըլանը դիտարկում է Հյուսիսային Իրաքում առկա PKK-ի ճամբարներն այլ երկրներ տեղափոխելու հարցը։
Դա մասնավորապես վերաբերում է հարևան երկրներին՝ Սիրիային ու Իրանին։ Պատճառը վերջին շրջանում Թուրքիայի և Հյուսիսային Իրաքի Քրդական Ինքնավարության ղեկավարության միջև հաստատված կառուցողական հարաբերություններն են, ինչն անհանգստացրել է PKK-ի ղեկավարությանը։ Բացի այդ, Թուրքիայի ռազմաօդային ուժերը շարունակ ռմբակոծում են Հյուսիսային Իրաքը։
Թուրքական կողմն ավելի հավանական է համարում տեղափոխության սիրիական տարբերակը՝ ընդգծելով, որ մի ժամանակ՝ 1982 թվականից սկսած, Օջալանը 16 տարի շարունակ թաքնվել է հենց Սիրիայում։ Անգամ նշվում է, թե Սիրիայի ղեկավարությունը «կանաչ լույս» է վառել PKK-ի առջև՝ նկատի ունենալով Թուրքիայի հետ ունեցած իր ներկայիս հարաբերությունները։
