Հարավային Կորեայում G-20-ի կենտրոնական բանկերի նախագահների եւ ֆինանսների նախարարների հանդիպման ժամանակ պետք է որոշում ընդունվի, որ կազմակերպության անդամ 20 երկրները արտարժույթը միտումնավոր «մրցակցային արժեզրկման» չեն ենթարկի` մեղմելու համար այն լարվածությունը, որն առկա է միջազգային առեւտրում, ասել է երկրներից մեկի ներկայացուցիչը` հղում անելով եզրափակիչ հայտարարության նախնական տարբերակին: Այս մասին հայտնում է РБК-ն:
Այս ֆոնին դոլարն իենի նկատմամբ արժեւորվեց 0,19%-ով եւ կազմեց 81,33 իեն` մեկ դոլարի դիմաց: Դոլարը 0,17%-ով արժեւորվեց նաեւ եվրոպական միասնական արտարժույթի նկատմամբ` հասնելով 1,3925-ի` մեկ եվրոյի դիմաց: Ընդհանուր առմամբ, դոլարը 6 մրցակից արտարժույթների զամբյուղի նկատմամբ արժեւորվեց 0,33%-ով` մինչեւ 77,43 կետ:
Դոլարի արժեւորմանը նպաստեց նաեւ ԱՄՆ ֆինանսների նախարար Թիմըթի Գայտների հայտարարությունը The Wall Street Journal-ում: Նրա կարծիքով, համաշխարհային հիմնական արտարժույթները «հավասարակշռված են»: Այս հայտարարությունից ենթադրվում է, որ եվրոյի եւ իենի նկատմամբ դոլարի հետագա արժեզրկման անհրաժեշտություն չկա:
