Ադրբեջանական Turan լրատվական գործակալության փոխանցմամբ՝ Amnesty International (AI) միջազգային իրավապաշտպան կազմակերպությունը հայտարարել է, որ ադրբեջանական իշխանությունները պետք է ազատ արձակեն բոլոր քաղբանտարկյալներին։
AI-ի տարածած հայտարարության մեջ նշված է. «20-ամյա բլոգեր Ջաբար Սավալանի ազատ արձակումը (Ալիևի համաներած 92 դատապարտյալներից) կարևոր քայլ է։ Սակայն Ադրբեջանի իշխանությունները պետք է ազատեն նաև մնացյալ 16 խղճի բանտարկյալներին, որոնք ազատազրկման մեջ են հայտնվել ապրիլյան խաղաղ ցույցերին մասնակցելու համար»։
Նշվում է, որ Սավալանը ձերբակալվել էր այս տարվա փետրվարի 5-ին և մեղադրվել թմրանյութեր պահելու մեջ։ Մինչդեռ իրականում նրան ազատազրկման էին դատապարտել Facebook սոցցանցով երիտասարդությանը բողոքի ակցիաներին մասնակցելու վերաբերյալ կոչեր ուղղելու համար։
Հիշեցնենք, որ այս տարվա նոյեմբերի 16-ին AI-ն հրապարակել էր Ադրբեջանում մարդու իրավունքների վերաբերյալ իր զեկույցը։ Դրանում նշված էր, որ այս տարվա մարտին և ապրիլին Բաքվում տեղի ունեցած փողոցային բողոքի ակցիաների ժամանակ ձերբակալվել են ժողովրդավարական բարեփոխումներ պահանջող հարյուրավոր խաղաղ ցուցարարներ, որոնցից 17-ը ներկայումս գտնվում են բանտում, ազատազրկված են մինչև 3 տարով և հանդիսանում են խղճի բանտարկյալներ։
