Այսօր «Ժառանգություն» խմբակցության անունից Ստեփան Սաֆարյանը դիմել է Հայաստանի Հանրապետության վարչապետ Տիգրան Սարգսյանին` Սյունիքի մարզի Քաջարան, Արծվանիկ, Սևաքար, Աճանան, Չափնի և Սյունիք համայնքների վարչական սահմաններում որոշ տարածքներում բացառիկ` գերակա հանրային շահ ճանաչելու և հողերի նպատակային նշանակությունը փոփոխելու մասին» Կառավարության 2011թ. ապրիլի 28-ի N 627-Ն որոշման շուրջ ստեղծված իրավիճակը և ընդլայնվող հանքարդյունաբերության հարուցած խնդիրները Ծննդյան տոներից անմիջապես հետո քննարկելու առաջարկով:
Այս մասին «Առաջին լրատվական»-ը տեղեկանում է «Ժառանգությունը» կուսակցության տարածած հաղորդագրությունից:
«Ժառանգությունը» առաջարկում է հարցի քննարկմանը հրավիրել Սյունիքի մարզի 5 համայնքների ղեկավարներին, հարցին առնչվող պետական այլ մարմինների ներկայացուցիչներին, ազդակիր համայնքների բնակչության, բնապահպանական կազմակերպությունների ու շարժումների և «Զանգեզուրի պղնձամոլիբդենային կոմբինատի ներկայացուցիչներին, Մարդու իրավուքնների պաշտպանին, ինչպես նաև քննարկման ժամանակ ապահովել «Ժառանգություն» խմբակցության պատգամավորների ներկայությունը, ինչպես պահանջում է ԱԺ կանոնակարգ օրենքը:
«Ժառանգություն» խմբակցությունը պաշտոնապես դիմել է նաև ԱԺ 5 մշտական հանձնաժողովների` Մարդու իրավունքների պաշտպանության և հանրային հարցերի, Գյուղատնտեսական և բնապահպանական հարցերի, Պաշտպանության, ազգային անվտանգության և ներքին գործերի, Տարածքային կառավարման և տեղական ինքնակառավարման հարցերի, Տնտեսական հարցերի հանձնաժողովների նախագահներին` նշված խնդիրներով առաջիկայում համատեղ խորհրդարանական լսումներ կազմակերպելու առաջարկով:
Ղեկավարվելով «Ժառանգություն» կուսակցության 2011թ. դեկտեմբերի 22-ի հայտարարությամբ` «Ժառանգության» պատգամավորներն այսօր շրջանառության մեջ են դրել ԱԺ-ի որոշման նախագիծ «Զանգեզուրի պղնձամոլիբդենային կոմբինատի (ԶՊՄԿ) մասնավորեցման գործընթացի, նրան հանքավայրերի շահագործման իրավունքներ տրամադրելու պայմանների, ԶՊՄԿ-ի կողմից ՀՀ-ում օրենքով սահմանված բնապահպանական չափորոշիչները պահպանելու և բնապահպանական վճարների կատարման, «Հայաստանի Հանրապետության Սյունիքի մարզի Քաջարանի, Արծվանիկի, Սևաքարի, Աճանանի, Չափնիի և Սյունիքի համայնքների վարչական սահմաններում որոշ տարածքներում բացառիկ` գերակա հանրային շահ ճանաչելու և հողերի նպատակային նշանակությունը փոփոխելու մասին» Կառավարության 2011թ. ապրիլի 28-ի N 627-Ն որոշման օրինականության ուսումնասիրության վերաբերյալ ԱԺ ժամանակավոր հանձնաժողով ստեղծելու մասին»:
