Եգիպտոսի գլխավոր այլախոհ, Ատոմայն էնեգիայի միջազգային գործակալության նախկին ղեկավար Մուհամմադ Ալ-Բարադեին իրանական Fars գործակալությանը տված հարցազրույցում հայտարարել է, որ երկրի զինվորական ղեկավարությունը «ԱՄՆ-ի հետ գաղտնի բանակցություններ է վարում՝ Իսրայելի հետ խաղաղության պայմանագրի վերաբերյալ»:
Ըստ այդ տեղեկության՝ բանակցությունների նախաձեռնողն ամերիկյան կողմն է: Նրանց նպատակն է երաշխավորել երկրի նոր կառավարության կողմից Քեմփ-Դևիդի պայմանագրի պահպանումը:
«Բանակցություններն ամբողջությամբ գաղտնի են և կոնֆիդենցիալ: Պնդում են, որ բանակցությունները նվիրված են երկկողմ հարաբերություններին, սակայն ես համոզված եմ, որ ամերիկացիները ցանկանում են իսլամիստների իշխանության գալուց հետո երաշխավորել Իսրայելի հետ խաղաղության պայմանագրի պայմանների պահպանումը»:
Հիշեցնենք, Եգիպտոսում տեղի ունեցած խորհրդարանական ընտրություններում հաղթել են «Մուսուլման եղբայրները» և ուլտրաֆունդամենտալ «Ալ-Նուր» կուսակցությունը:
Ավելի վաղ «Ալ-Նուրի» ղեկավարությունը հայտարարել էր, որ կպահպանի նախկինում կնքված բոլոր պայմանագրերը, այդ թվում՝ Քեմփ-Դևիդը: «Մուսուլման եղբայրները» նույնպես հայտարարել են, որ չեն պատրաստվում վերանայել Իսրայելի հետ հաշտության պայմանագիրը:
