Թուրքական Dünya Bülteni կայքի փոխանցմամբ՝ աշխարհի չորս կողմերից Թուրքիա ժամանած 200 թուրք դեսպաններ ու դիվանագետներ Անկարայում մասնակցել են «Ահաբեկչության դեմ պայքարին» նվիրված նիստին, որում քննարկվել է Թուրքիայում ահաբեկչական հռչակված ու արգելված «Քրդստանի աշխատավորական» կուսակցության (PKK) դեմ պայքարը։ Այդ կապակցությամբ կայացվել է 3 կարևոր որոշում.
«1) ազատության հավասարակշռության վրա շեշտի դնում։ Թուրքիան մի կողմից պետք է ավելացնի ժողովրդավարության ուղղությամբ իր ջանքերը, իսկ մյուս կողմից շարունակի ահաբեկչության դեմ պայքարը։ Այդ պայքարի շարունակումը չի ենթադրում ժողովրդավարության և ազատությունների սահմանափակում։
2) PKK-ի ֆինանսական աղբյուրների կտրում։ Թուրքիայից անհանգստացած երկրները PKK-ն օգտագործում են որպես գործիք և այդ նպատակով սկսում են ֆինանսավորել նրան։ Դա մասնավորապես վերաբերում է եվրոպական երկրներին։ Յուրաքանչյուր թուրք դեսպան պետք է պատասխանատվություն կրի տվյալ երկրից PKK-ի ֆինանսավորումը կանխելու հարցում։
3) PKK-ի տպագիր մամուլի և նրան աջակցող կազմակերպությունների փակում։ PKK-ի տպագիր մամուլը և նրան աջակցող կազմակերպությունները եվրոպական մի շարք երկրներում զբաղված են նրա օգտին քարոզչության իրագործմամբ և զենքի առաքմամբ։ Թուրք դեսպանները պետք է պատասխանատվություն կրեն այդ ամենին վերջ դնելու հարցում»։
Հիշեցնենք, որ թեև PKK-ն հիմնադրվել է 1978 թվականին (հիմնադիր Աբդուլլահ Օջալան), Թուրքիայում նրա ակտիվ զինված պայքարը սկսվել է 1984 թվականին։ Թուրքիայի տրանսպորտի նախարար Բինալի Յըլդըրըմի տվյալներով, 1984-2011 թվականներին PKK-ի դեմ մղած 27-ամյա պայքարում Թուրքիայի ուղղակի ծախսերը կազմել են 300 միլիարդ դոլար։ Սակայն անուղղակի ծախսերը շատ ավելի մեծ են՝ 700 միլիարդ դոլար։ Ընդհանուր առմամբ, PKK-ի դեմ 27-ամյա պայքարը Թուրքիայի վրա արժեցել է 1 տրիլիոն դոլար։
