ՄԱԿ-ում ՌԴ մշտական ներկայացուցիչ Վիտալի Չուրկինը հայտարարել է, որ Մոսկվան հստակ պատկերացնում է Արևմուտքի այն որոշումների սահմանները, որոնք նա կիրառում է, և որոնք անթույլատրելի են: Մասնավորապես դրանք Դամասկոսի նկատմամբ պատժամիջոցներն են, որոնց իրականացումը պնդում են ԱՄՆ-ն և Եվրոպան արդեն մի քանի ամիս: Այս մասին հայտնում է Reuters գործակալությունը:
«Եթե մեզնից պահանջում են աչք փակել ընդդիմության ծայրահեղականների կողմից կիրառվող բռնությունների վրա, ապա այդպես չի լինի: Եթե մեզնից սպասում են էմբարգո դնել զենք մատակարարելու վրա (Սիրիային.- 1in.am), ապա դա տեղի չի ունենա: Մենք գիտենք, թե ինչ է նշանակում էմբարգո այդ իրավիճակում, և դա մենք տեսել ենք Լիբիայի պարագայում. եթե դու չես կարող զենք մատակարարել ազգային կառավարությանը, ցանկացած մեկը կարող է զինել ընդդիմությանը»,- ընդգծել է Չուրկինը:
Չուրկինը նման հայտարարությամբ է հանդես եկել` պատասխանելով ՄԱԿ-ի ԱԽ-ում Գերմանիայի ներկայացուցիչ Պետեր Վիտիգին, որը վերանայելով Ռուսաստանի կողմից առաջարկված Սիրիայի վերաբերյալ բանաձևը, ասել էր, որ բանաձևում Սիրիայում բնակչության դեմ բռնությունների դադարեցման համար ներկայացված են քիչ միջոցներ:
Նրա կարծիքով՝ Ռուսաստանի կողմից առաջարկված բանաձևն անարդյունավետ է ճգնաժամից դուրս գալու համար: Խոսելով փաստաթղթի մասին՝ նա նշել էր, որ Ռուսաստանի առաջարկած ուղղումներով նախագիծը շատ չի տարբերվում իր սկզբնական տարբերակից: ՌԴ ներկայացրած Սիրիայի վերաբերյալ բանաձևի սկզբնական տարբերակը ՄԱԿ-ի ԱԽ կողմից գնահատվել է չափազանց մեղմ:
«Նման կերպ Ռուսաստանի կողմից առաջարկված նախագիծն անարդյունավետ է»,- հայտարարել է Վիտիգը: «Մենք պետք է աջակցենք Արաբական երկրների լիգային, համագործակցենք Սիրիայի վերաբերյալ որոշումների շուրջ»,- հավելել է նա:
Հիշեցնենք, որ դեկտեմբերի 16-ին Ռուսաստանը ՄԱԿ-ի ԱԽ-ին առաջարկել է Սիրիայի վերաբերյալ նոր բանաձև: Փաստաթղթում ասվում է, որ դատապարտվում է հակամարտության մասնակիցների` ինչպես կառավարական ուժերի, այնպես էլ ընդդիմադիր շարժումների կողմից իրականացվող բռնությունը, ինչպես նաև անհանգստություն է հայտնվում Սիրիայի տարածք զենքի անօրինական մատակարարման կապակցությամբ:
