Ոստիկանության և ՄՀՕՋ-ի ուժերը արդեն հերթապահում են Մոսկվայի Սախարովի պողոտայում, որտեղ տեղի է ունենալու Մոսկվայի իշխանությունների կողմից արտոնված ընդդիմության ցույցը: Պողոտայի ամբողջ երկայնքով հերթապահում են իրավապահ մարմինների աշխատակիցներով լի ավտոբուսները:
Ինչպես հաղորդում է РИА Новости-ն, ընդհանուր առմամբ պողոտայում իրավիճակը հանգիստ է, անցորդները քիչ են, մարդիկ դեռ չեն հավաքվել:
Ոստիկաններից մեկը РИА Новости-ին ասել է, որ պողոտայում հերթապահում են «ոստիկանների և ՄՀՕՋ-ի աշխատակիցների մոտ 50 ավտոբուս»:
Սախարովի պողոտայի մետրոյի կայարաններում ոստիկանությունը հերթապահում է խստացված ռեժիմով, սակայն մուտքի և ելքի ոչ մի սահմանափակումներ դեռ չկան: Պողոտայի երթևեկությունը և առևտուրը դադարեցվել են: Ոստիկանության և ՄՀՕՋ-ի ավտոբուսները հերթապահում են նաև Մյասնիցկայա փողոցում, որը զուգահեռ է Սախարովի պողոտային:
Հիշեցնենք, որ այսօր տեղի է ունենալու ընդդիմության կազմակերպած երկրորդ ցույցը, որին մասնակցելու է մոտ 50 հազար մարդ: Միջոցառումը տեղի է ունենալու Սախարովի պողոտայում: Ցույցի մասնակիցները պահանջում են չեղյալ հայտարարել Պետդումայի ընտրությունները, նոր ընտրություններ նշանակել, ինչպես նաև պահանջում են ԿԸՀ նախագահ Վլադիմիր Չուրովի հրաժարականը:
