ՀԱԿ-իշխանություն երկխոսությունը հասարակությանը հիասթափեցրեց քաղաքականությունից: Այսօր լրագրողների հետ հանդիպմանը նման տեսակետ հայտնեց ԱԺ «Ժառանգություն» խմբակցության պատգամավորը` քաղաքական տարին բարեհաջող չհամարելով:
Նրա խոսքով` տեղի ունեցան որոշ գործընթացներ, որոնք հասարակության հետ կապ չունեին, օրինակ` երկխոսությունը: Նրա համոզմամբ` դա հասարակությունից հեռու գործընթաց էր: «Դրա արդյունքում ունեցանք այն, որ քաղաքացին հիասթափվեց քաղաքականությունից: Եվրախորհուրդը մարտիմեկյան դեպքերը դուրս թողեց օրակարգից, որի հիմնավորումը երկխոսությունն էր: Տեղի ունեցավ փետրվարյան կոալիցիոն հուշագրի ստորագրումը: Այս ամենը, իհարկե, չէր կարող լուծել հասարակության խնդիրները, բայց լուծեց իշխանությունների պահպանման խնդիրը»,- մեկնաբանեց Ա. Մարտիրոսյանը`հավելելով, որ մարտ ամսի մեծ բողոքի ալիքը մարեց երկխոսության միջոցով:
Նա արձանագրեց, որ հաջողություններ նույնպես եղել են: «Կարծում եմ ` հաջողություններ տեղի ունեցան մարզական աշխարհում: Բազմաթիվ մրցաշարերում ՀՀ դրոշը բարձրացավ: Փառք մեր մարզիկներին, ովքեր այս տարի կարողացան ապահովել մեր հիմնի և դրոշի բարձրացումը»,- նշեց Ա. Մարտիրոսյանը:
Խոսելով իշխանական փոփոխությունների շուրջ` նա ասաց. «Այն իմիտացիոն փոփոխությունները, որոնք իշխանությունները փորձում են անել, թող որ դառնան իսկապես բեկումնային, և այդ բարեփոխումների ընթացքում կունենանք իրական փոփոխություններ»:
Անդրադառնալով «Ժառանգություն» կուսակցության նախընտրական համագործակցություններին` նա ասաց, որ ցանկացած քաղաքական ուժի հետ կուսակցությունը կհամագործակցի, եթե լինեն նույն նպատակները:
«Ցանկացած իշխանական կուսակցության հետ, որը կհամաձայնի պառլամենտական կառավարությանը, որտեղ տնտեսությունը և քաղաքականությունը պետք է տարանջատվեն, մոնոպոլիզմը, հովանավորչությունը վերանա, Մարտի մեկի զոհերի գործերը բացահայտվեն, հայ-թուրքական արձանագրությունները ետ կանչվեն, կհամագործակցենք»,- ամփոփեց Արմեն Մարտիրոսյանը: