Ադրբեջանական ANS PRESS-ի փոխանցմամբ՝ Ադրբեջանի նախագահի աշխատակազմի հասարակական-քաղաքական հարցերի բաժնի ղեկավար Ալի Հասանովը լրագրողների հետ զրույցում հայտարարել է, որ Հայոց ցեղասպանության օրինագծի հերքումը քրեականացնող օրինագիծն իրենք դիտարկում են երկու տեսանկյունից.
«Դա հայերի «հավակնություններն» են, որոնք ցանկանում են համայն աշխարհին «ապացուցել» Հայոց ցեղասպանության իրական լինելը։ Մյուս կողմից էլ մենք կարծում ենք, որ այդ հարցը քաղաքականացված է, մինչդեռ այդպիսի հարցերը «պետք է քննեն» պատմաբանները։ Օրինագծի ընդունումը կարող է բացասաբար ազդել թուրք-ֆրանսիական հարաբերությունների վրա»։
Հիշեցնենք, որ երեկ էլ Ադրբեջանի խորհրդարանի առաջին փոխնախագահ Զիյաֆեթ Ասկերովը հայտարարել էր, որ Ֆրանսիայի խորհրդարանի կողմից Հայոց ցեղասպանության հերքումը քրեականացնող օրինագծի ընդունումը կարող է «բացասաբար ազդել» նաև ֆրանս-ադրբեջանական հարաբերությունների վրա։
