Արդեն 8 տարի է, ինչ հանդիսատեսի հետ երկխոսության մեջ է «MEA CULPA կամ իմ մեղքը» երկու գործողությամբ տրագիկոմեդիան: Դերասաններ Լևոն Հարությունայանը, Հրանտ Թոխատյանը, Սամսոն Ստեփանյանը, ներկայացման պրոդյուսեր Արմեն Համբարձումյանը, ռեժիսոր Արթուր Սահակյանը և դրամատուրգ Վահրամ Սահակյանը լրագրողների հետ հանդիպման ժամանակ ներկայացրին «Իմ մեղքը» ներկայացման DVD տարբերակը, որը նկարահանվել է 2004թ: Ներկայացման պրոդյուսեր Արմեն Համբարձումյանը ցավով նշեց, որ ներկայացումը շարունակվում է երկար տարիներ. «Շատ անգամներ նշել ենք, որ շատ ենք զղջում, որ ներկայացումը շարունակվում է շատ երկար: Անելուց մենք չէինք մտածել, որ ինքը այսքան երկար կյանք կունենա և ներկայացման մեջ որպես ապագա մենք ընտրել ենք 2015թ., գործողությունը կատարվում է 2015թ., երբ մենք աշխատել ենք ներկայացման վրա, մեր ընկալումը եղել է, որ դա շատ հեռավոր ապագա է, բայց ցավոք 2015թ. արդեն մոտ է: «MEA CULPA» ներկայացումը Երևանում խաղացվել է 500 անգամ, 300,000 հանդիսատես դիտել է այս ներկայացումը: Եկել են բոլոր խավերի ներկայացուցիչները. այսօրվա նախագահը, պատգամավորները, դասախոսներ, բոլորը, բոլորը նայել են այս ներկայացումը»:
Ստեղծագործական խումբը խոսեց նաև այսօրվա թատրոնի մասին, թե ինչ դեր ունի մեր հասարակության մեջ` նշելով, որ թատրոնի պահանջարկ միշտ էլ կլինի, պարզապես պահանջարկն այնպիսին է, ինչպիսին հասարակությունն է: «Հասարակությունը այսօր պահանջում է էս տիպի թատրոն, էս տիպի հեռուստատեսություն, էս տիպի երաժշտություն, էս տիպի նկատի ունեմ առկա, բայց նաև թատրոնը պետք է հասցնի իրականության հետևից` գուցե և հերքելով այդ իրականությունը: Թատրոնի պահանջարկ միշտ էլ լինելու է: Մենք աշխատում ենք նրա համար, ով գալիս է ներկայացում դիտելու»,-ասաց ռեժիսոր Արթուր Սահակյանը` նշելով, որ մեր հասարակությունն այսօր անտաղանդ է:
Դերասան Լևոն Հարությունյանը նշեց, որ կա անտաղանդ հասարակություն, և կա տաղանդավոր հասարակություն. «Մենք խաղում ենք բոլորի համար, թատրոնը կա և միշտ էլ լինելու է»:
Դերասան Հրանտ Թոխատյանն էլ նշեց, որ այսօր տոն է իր համար, որովհետև նա DVD տարբերակին սպասել է շատ երկար. «DVD տարբերակը չի խանգարի, կապրի իր կյանքով, իսկ ներկայացումը կշարունակի ապրել այնքան, ինչքան հանդիսատեսը կգա: 8 տարի է` ես պատիվ ունեմ մասնակցելու այս ներկայացմանը և խաղալու իմ ընկերների հետ»:
